Dövlət Komitəsinin sədri “Şirvan şəhər məscidi”ni ziyarət edib

Dini Qurumlarla İş üzrə Dövlət Komitəsinin sədri Ramin Məmmədov noyabrın 14-də “Şirvan şəhər məscidi”ndə din xadimləri ilə görüşüb.

Görüşdə Dövlət Komitəsinin sədri Azərbaycanda dinlərarası münasibətlər, tolerantlıq ənənələri, milli-mənəvi dəyərlərimizin təbliği ilə bağlı fikirlərini bölüşüb. Bildirib ki, ölkəmizin tolerantlıq modelinin, dini dözümlülüyün mahiyyətinin ictimaiyyətə düzgün çatdırılması, eləcə də dövlətçilik və vətənpərvərlik din xadimlərinin fəaliyyətinin əsasını təşkil etməlidir.

Ramin Məmmədov qeyd edib ki, Azərbaycanda dövlət-din münasibətləri, dinlərarası əlaqələr sağlam zəmin üzərində qurulub. Bu, dövlət siyasətinin prioritet istiqamətlərindən biridir.

Din xadimləri Azərbaycan dövlətinin dinə və dini icmalara göstərdiyi dəstəyin böyük önəm daşıdığını vurğulayıblar. Görüşdə, din xadimlərinin təklifləri dinlənilib, görüləcək işlərə dair fikir mübadiləsi aparılıb.