https://www.innews.az/uploads/news/2026-11/_innews_cedef6cb3f73ae011c64b61c1_o.jpg
Vətənpərvər mahnıların ifaçısı, müğənni Rəşad İsmayıl dünya musiqisinin məşhur nümunələrindən olan “I Say a Little Prayer” kompozisiyasını Azərbaycan muğamı ilə Qərb estrada musiqisinin sintezində yeni formatda təqdim edib.
Sənətçi layihə haqqında fikirlərini bölüşərək bildirib ki, ötən əsrin 60-cı illərinin sonlarında Qərbdə böyük populyarlıq qazanan mahnını ilk dəfə Dionne Warwick ifa edib. 1968-ci ildə isə Aretha Franklinin ifası əsərin daha geniş auditoriyaya çatmasına və dünya musiqi tarixində özünəməxsus yer tutmasına səbəb olub. Sonrakı illərdə kompozisiya müxtəlif animasiya və bədii filmlərdə, televiziya proqramlarında və konsertlərdə səsləndirilib.
Rəşad İsmayıl qeyd edib ki, gənclik illərindən Qərb musiqisinə xüsusi maraq göstərib və bu mahnını da həmişə sevərək dinləyib. Onun sözlərinə görə, kompozisiyanı yeni musiqi yanaşması ilə təqdim etmək qərarı illər əvvəl formalaşıb. Bu ideyanın reallaşdırılması üzərində iş isə iki il davam edib.
Layihənin çəkilişləri Azərbaycan, Dubay, Polşa, Almaniya və İsveçrədə aparılıb. Müğənni bildirib ki, sözügedən ölkələrə əsasən işgüzar və qastrol səfərləri çərçivəsində etdiyi səyahətlərdən layihənin çəkilişləri üçün də yararlanıb. Kompozisiya ilk dəfə ötən il, sənətçinin 45 illik yubileyində ifa olunub və həmin canlı ifa anları da klipə daxil edilib.
“Bir Ailə Hekayəsi” (One Family’s Story) adlandırılan layihənin diqqətçəkən cəhətlərindən biri də ailə üzvlərinin və yaxın dostların çəkilişlərdə iştirakı olub.
Musiqi layihəsi Xəyyam Xəlilovun ifasında “Bayatı-Şiraz” muğamı ilə başlayır. Əməkdar artist Əliağa Sədiyev tarda, Fərid Mayılov isə saksofonda müşayiət edir.
Kompozisiyanın aranjimanı musiqiçi və aranjimançı Vasif Arifoğlu tərəfindən hazırlanıb. Qeyd edək ki, “I Say a Little Prayer” mahnısının musiqisi Burt Bacharach, sözləri isə Hal Davidə məxsusdur.
Rəşad İsmayılın sözlərinə görə, layihənin əsas məqsədi Azərbaycan muğamının zənginliyini Qərb estrada musiqisi ilə sintez edərək beynəlxalq auditoriyaya çatdırmaqdır. Sənətçi arzulayır ki, onun yeni ifası ABŞ-da, Avropada və dünyanın digər ölkələrində dinləyicilərin diqqətini cəlb etsin, milli musiqi irsimizin fərqli janrlarla vəhdətdə təqdimatı geniş rəğbət qazansın.
O, bu təşəbbüsün yalnız musiqi layihəsi kimi deyil, həm də Azərbaycan muğamının beynəlxalq musiqi məkanında tanıdılmasına töhfə verən yaradıcı yenilik kimi tarixə düşəcəyinə ümid etdiyini bildirib.
Ən son xəbərləri səhifəmizdən də izləyin