https://www.innews.az/uploads/news/2026-11/_innews_0ecc7b1a8302f340738601d5b_o.jpg
AZCON Holding şirkətlərindən olan Azərbaycan Respublikasının Kosmik Agentliyinin (Azərkosmos) Radiotezliklərin idarə edilməsi şöbəsinin rəhbəri Sitarə Mehdiyeva Beynəlxalq Telekommunikasiya İttifaqının (BTİ) Radio Tənzimləmə Komitəsinə (Radio Regulations Board – RRB) C regionu (Şərqi Avropa və Şimali Asiya) üzrə 2027–2030-cu illər üçün üzv seçilib.
Seçki noyabrın 9-dan 27-dək Qətərin paytaxtı Dohada keçirilən BTİ-nin Səlahiyyətli Nümayəndələr Konfransı (PP-26) çərçivəsində baş tutub. Sitarə Mehdiyeva BTİ-yə üzv dövlətlərin səsverməsi nəticəsində 111 səs toplayaraq C regionu üzrə ən yüksək nəticəni göstərib.
Azərbaycanlı mütəxəssisin BTİ-nin radiorabitə sahəsində fəaliyyət göstərən əsas qurumlarından birinə seçilməsi ölkəmizin beynəlxalq mövqeyinin möhkəmlənməsi, peyk rabitəsi və radiotezlik spektrinin idarə olunması sahəsində milli ekspert potensialının beynəlxalq səviyyədə tanınması baxımından strateji əhəmiyyət daşıyır. Bu nəticə, eyni zamanda, Azərbaycanın peyk sistemlərinin beynəlxalq koordinasiyası və radiotezliklərin idarə edilməsi istiqamətində formalaşdırdığı peşəkar təcrübəni və kadr potensialını nümayiş etdirir.
Radio Tənzimləmə Komitəsi dörd il müddətinə seçilən 12 müstəqil ekspertdən ibarətdir. C regionu üzrə ayrılmış iki yer uğrunda beş ölkədən – Azərbaycan, Gürcüstan, Qazaxıstan, Özbəkistan və Rusiyadan olan namizədlər mübarizə aparıb.
Komitə radiotezlik spektrindən və peyk orbitlərindən istifadəni tənzimləyən əsas beynəlxalq müqavilə olan Radioreqlamentin tətbiqi və şərhində mühüm rol oynayır. Qurumun səlahiyyətlərinə Radioreqlamentin tətbiqi prosedurlarının təsdiqlənməsi, həll olunmamış zərərli radiomaneə hallarının nəzərdən keçirilməsi, eləcə də BTİ-nin Radiorabitə Bürosunun müvafiq qərarlarından verilən şikayətlərə baxılması daxildir.
Komitənin fəaliyyəti qlobal telekommunikasiya infrastrukturunun etibarlı və dayanıqlı inkişafı üçün mühüm əhəmiyyət kəsb edir. Radiotezliklərin və peyk şəbəkələrinin beynəlxalq səviyyədə səmərəli koordinasiyası müxtəlif rabitə sistemlərinin qarşılıqlı uyğunluğunun təmin olunmasına, radiomaneə risklərinin azaldılmasına və məhdud orbit-tezlik resurslarından səmərəli istifadəyə şərait yaradır.
Sitarə Mehdiyevanın seçilməsi azərbaycanlı mütəxəssislərin beynəlxalq radiorabitə tənzimlənməsi sahəsində ardıcıl uğurlu iştirakının davamıdır. Belə ki, 2018 və 2022-ci illərdə Sahibə Həsənova da BTİ-nin Radio Tənzimləmə Komitəsinə üzv seçilib. Bu, azərbaycanlı mütəxəssislərin Komitəyə ardıcıl üçüncü seçkidə üzv seçilməsi deməkdir.
Sitarə Mehdiyeva peyk sistemləri, radiorabitə və radiotezlik spektrinin idarə olunması sahəsində 14 ildən artıq peşəkar təcrübəyə malikdir. O, 2012-ci ildən Azərkosmosda fəaliyyət göstərir və bu müddət ərzində peyklərin istismarı, radiotezliklərin koordinasiyası və peyk sistemlərinin normativ-texniki təminatı istiqamətlərində müxtəlif mühəndis və rəhbər vəzifələrdə çalışıb.
Sitarə Mehdiyeva, həmçinin Qlobal Peyk Operatorları Assosiasiyasında (Global Satellite Operators Association – GSOA) MDB regionu üzrə həmsədrdir.
Ən son xəbərləri səhifəmizdən də izləyin