https://www.innews.az/uploads/news/2026-11/_innews_00f79cfb89e4b9d08d654a127_o.jpg
Müasir dünyada süni intellekt informasiya müharibələrinin xarakterini, kiberəməliyyatların miqyasını və beynəlxalq təsir mexanizmlərini dəyişir. Belə bir şəraitdə Azərbaycanda rəqəmsal transformasiya milli təhlükəsizliyin və dövlət suverenliyinin mühüm təminatlarından biridir.
"innews media" xəbər verir ki, bunu Xüsusi Rabitə və İnformasiya Təhlükəsizliyi Dövlət Xidmətinin rəisi İlqar Musayev Bakıda keçirilən “Kiberdiplomatiya üzrə II Beynəlxalq Konfrans: Süni intellekt dövründə güc və təsir” mövzusunda tədbirdə çıxışı zamanı bildirib.
Onun sözlərinə görə, informasiya təhlükəsizliyi və kibertəhlükəsizlik məsələləri Azərbaycanda dövlət siyasətinin prioritet istiqamətlərindən biri kimi daim diqqət mərkəzində saxlanılır.
İlqar Musayev qeyd edib ki, texnologiyanın inkişafı yalnız iqtisadiyyatın və sosial həyatın transformasiyasına deyil, həm də beynəlxalq münasibətlərin xarakterinin, dövlətlərarası rəqabətin və qlobal güc balansının dəyişməsinə səbəb olur.
“Rəqəmsal texnologiyalar, süni intellekt və kiberməkan artıq dövlətlərin strateji maraqlarının formalaşmasına, milli təhlükəsizlik siyasətinə və beynəlxalq münasibətlər sisteminə birbaşa təsir göstərən amillərə çevrilib. Xüsusilə süni intellektin sürətli inkişafı bu dəyişikliklərə yeni ölçü qazandırır. Süni intellekt dövlətlərin texnoloji və iqtisadi imkanlarını genişləndirməklə yanaşı, informasiya müharibələrinin xarakterini, kiberəməliyyatların miqyasını və beynəlxalq təsir mexanizmlərini dəyişir”, – deyə o vurğulayıb.
Xidmət rəisi bildirib ki, müasir dövrdə kibertəhlükəsizliyə yalnız texniki müdafiə məsələsi kimi yanaşmaq kifayət deyil. Beynəlxalq təcrübə göstərir ki, kibertəhlükəsizlik risklərin əvvəlcədən müəyyənləşdirilməsi, davamlı monitorinq, qabaqlayıcı müdafiə, insidentlərə operativ reaksiya və xidmətlərin dayanıqlı bərpasını əhatə edən fasiləsiz prosesdir.
İlqar Musayevin sözlərinə görə, Dövlət Xidmətinin əsas fəaliyyət istiqamətlərindən biri dövlət informasiya sistemlərinin və kritik informasiya infrastrukturunun mühafizəsi, kibertəhdidlərin vaxtında aşkarlanması, insidentlərə çevik reaksiya verilməsi və qabaqlayıcı müdafiə mexanizmlərinin inkişaf etdirilməsidir.
Ən son xəbərləri səhifəmizdən də izləyin