https://www.innews.az/uploads/news/2026-11/_innews_2fd49842ed7e28f5c04a3e236_o.jpg
Azərbaycan Kamandan Oxatma Federasiyasının baş katibi Fərid Xəlilov noyabrın 4–14-də ABŞ-da işgüzar səfərdə olub. Səfərin əsas məqsədi idman sahəsində qabaqcıl beynəlxalq təcrübənin öyrənilməsi, idman idarəçiliyi üzrə müasir yanaşmalarla tanışlıq və beynəlxalq əməkdaşlıq imkanlarının genişləndirilməsi olub.
Səfərin Kolorado-Sprinqs mərhələsində Fərid Xəlilov şəhər Şurasının 6-cı dairə üzrə üzvü Roland Rainey ilə görüşüb. Görüş zamanı idmanın inkişafı, gənclərin idmana cəlb olunması, idman təşkilatlarının idarə edilməsi və peşəkar idman strukturlarının fəaliyyəti istiqamətində təcrübə mübadiləsi aparılıb. Futbol sahəsində geniş təcrübəyə malik olan Roland Rainey idman təşkilatlarının yaradılması, gənclərin inkişafının dəstəklənməsi və idmanın təşviqi istiqamətində həyata keçirdiyi fəaliyyət barədə məlumat verib.
Səfərin Vaşinqton mərhələsində Fərid Xəlilov ABŞ Kamandan Oxatma Federasiyasının (USA Archery) icraçı direktoru Mary Emmons ilə görüşüb. Görüşdə kamandan oxatma idman növünün inkişaf perspektivləri, idmançıların hazırlıq sistemi, məşq prosesinin təşkili, müasir infrastruktur imkanları və qarşılıqlı təcrübə mübadiləsi məsələləri müzakirə olunub. Həmçinin iki ölkənin müvafiq idman qurumları arasında əməkdaşlığın genişləndirilməsi imkanları ətrafında fikir mübadiləsi aparılıb.
Səfər Azərbaycan Kamandan Oxatma Federasiyasının beynəlxalq əlaqələrinin genişləndirilməsi, ABŞ-ın idman və oxatma sahəsindəki təcrübəsinin öyrənilməsi, eləcə də qabaqcıl yanaşmaların ölkəmizdə bu idman növünün inkişafı istiqamətində tətbiqi imkanlarının qiymətləndirilməsi baxımından əhəmiyyət daşıyır.
Qeyd edək ki, səfər ABŞ Konqres Kitabxanası tərəfindən dəstəklənən və ABŞ-nin Azərbaycandakı səfirliyi ilə tərəfdaşlıq çərçivəsində həyata keçirilən “Open World” proqramının “İdman vasitəsilə iqtisadi inkişaf” (Economic Development through Sports) layihəsi çərçivəsində təşkil olunub. Proqramda Azərbaycan Kamandan Oxatma Federasiyası ilə yanaşı, Azərbaycan Güləş Federasiyası, Azərbaycan Su İdmanı Növləri Federasiyası, Azərbaycan Üzgüçülük Federasiyası və Azərbaycan Minifutbol Federasiyasının rəhbər şəxsləri də iştirak ediblər.
Ən son xəbərləri səhifəmizdən də izləyin