https://www.innews.az/uploads/news/2026-11/_innews_57c4f3f143cb801c78c48e1d5_o.jpg
17 noyabr – Beynəlxalq Tələbə Günü münasibətilə Azərbaycan Dövlət Pedaqoji Universitetində (ADPU) bir qrup fərqlənən tələbələrlə görüş keçirilib.
Universitetin Tədbirlərin təşkili və tələbələrlə iş şöbəsinin təşkilatçılığı ilə keçirilən görüşdə ADPU-nun rektoru professor Cəfər Cəfərov, tədris işləri üzrə prorektor dosent Eldar Aslanov, elm və innovasiyalar üzrə prorektor professor Asəf Zamanov, sosial və humanitar məsələlər üzrə prorektor professor Fikrət Rzayev, ümumi işlər üzrə prorektor Tural Cəlilov, İncəsənət və fiziki tərbiyə fakültəsinin dekanı, s.ü.f.d. Anar Fərmayılov, Hüquq şöbəsinin müdiri Qürbət Əsgərov, Tədbirlərin təşkili və tələbələrlə iş şöbəsinin müdiri Turan Kərimli, İctimaiyyətlə əlaqələr və marketinq şöbəsinin müdiri Taleh Mirzəyev, eləcə də 33 nəfər tələbə iştirak edib. İştirakçılar arasında 2026-cı ildə ADPU-ya yüksək balla qəbul olunaraq Firudin bəy Köçərli və “Uğur” təqaüdləri alan, müsabiqədənkənar qəbul olunmuş idmançılar, semestr imtahanlarında yüksək nəticələr göstərərək adlı təqaüd alan tələbələr və universitetdə fəaliyyət göstərən tələbə təşkilatlarının rəhbərləri iştirak ediblər.
Çıxış edən rektor prof. Cəfər Cəfərov görüşün eyni zamanda 17 noyabr – Milli Dirçəliş Gününə təsadüf etdiyini vurğulayaraq, bu günün tarixi və mənəvi əhəmiyyətindən bəhs edib, milli özünüdərk, vətənə bağlılıq və dövlətçilik düşüncəsinin gənc nəslin formalaşmasındakı rolunu qeyd edib. Bu dəyərlərin Vətən müharibəsində bir daha təcəssüm etdiyini qeyd edən rektor gənclərin vətənpərvərlik ruhunda yetişdirilməsinin vacibliyinə diqqət çəkib. Müəllim hazırlığının bu missiyaların həyata keçirilməsində xüsusi əhəmiyyətinə toxunan prof. C.Cəfərov süni intellekt kimi sistemlərin müasir inkişafı fonunda müəllimlik peşəsinin yeni çağırışlarla üzləşdiyini, lakin müəllimin şəxsiyyətin formalaşması, tənqidi düşüncənin və mənəvi dəyərlərin aşılanmasında əvəzsiz rolunun dəyişmədiyini qeyd edib.
Daha sonra tələbələr akademik nailiyyətləri, universitet həyatı, tələbə təşkilatlarının fəaliyyəti və gələcək hədəfləri barədə fikirlərini bölüşüb, təkliflərini səsləndiriblər.
Tələbələrin uğurlarının universitet rəhbərliyi səviyyəsində qiymətləndirilməsi, onların fikir və təşəbbüslərinin birbaşa dinlənilməsi, tələbə–universitet münasibətlərində açıq dialoqun gücləndirilməsi baxımından əhəmiyyət daşıyan görüş qarşılıqlı fikir mübadiləsi ilə davam edib.
Ən son xəbərləri səhifəmizdən də izləyin