https://www.innews.az/uploads/news/2026-09/_innews_776b2ae2b1c78dff6b9388af2_o.jpg
FIA Formula 2 çempionatı 2027, 2028 və 2029-cu illər üçün istifadə olunacaq yeni bolidini İtaliya Qran-prisi həftəsonunda Monzada təqdim edib.
Yeni avtomobil “Autodromo Nazionale Monza”nın paddokunda keçirilən xüsusi təqdimat mərasimində nümayiş etdirilib.
Formula 2 uzun illərdir gənc pilotların bacarıqlarını nümayiş etdirərək Formula 1-ə yüksəlməsi üçün əsas platformalardan biri kimi çıxış edir. Çempionatın son məzunları arasında hazırkı Formula 1 pilotları, o cümlədən Kimi Antonelli, Isack Hadjar və Arvid Lindblad da yer alır.
Yeni F2 bolidi məhz sürücülərin Formula 1-ə daha yaxşı hazırlanması və trasda daha sıx mübarizənin təmin edilməsi məqsədilə hazırlanıb.
Avtomobilin əsas yenilikləri arasında yenilənmiş ön və arxa qanadlar, eləcə də trasda dayanma və ya fırlanma zamanı pilotun avtomobili yenidən işə salmasına imkan verən bort starteri yer alır.
Yeni bolidin dizaynı hazırkı Formula 1 avtomobillərinin fəlsəfəsinə daha yaxınlaşdırılıb. Bununla belə, xərclərin nəzarətdə saxlanılması məqsədilə hazırkı Dallara şassisi qorunub.
Formula 2 yeni avtomobildə Aramco tərəfindən təchiz edilən qabaqcıl dayanıqlı yanacaqdan və Pirelli şinlərindən istifadəni davam etdirəcək.
Bolidin əyləc performansı, sükan idarəetmə səyi və kokpit erqonomikası üzrə mövcud xüsusiyyətləri də dəyişdirilməyib. Bu isə müxtəlif fiziki xüsusiyyətlərə malik geniş sürücü qrupunun avtomobildən istifadə edə bilməsini təmin etməyə yönəlib.
Formula 1-in prezidenti və baş icraçı direktoru Stefano Domenikali yeni bolidin Formula 1-ə yüksəlmək istəyən gənc pilotların hazırlanmasında mühüm rol oynayacağını bildirib.
Formula 2-nin CEO-su Bruno Mişel isə yeni avtomobil hazırlanarkən əsas məqsədin onun Formula 1 üçün effektiv hazırlıq vasitəsi olaraq qalmasını təmin etmək olduğunu vurğulayıb.
Onun sözlərinə görə, ön və arxa qanadların yenilənməsi həm xərclərin idarə olunmasına, həm də avtomobilin görünüşünün Formula 1 bolidlərinə yaxınlaşdırılmasına və daha sıx yarışların keçirilməsinə imkan verəcək.
2027-ci ildən etibarən yeni bolidin Formula 2 yarışlarında əsas avtomobil kimi istifadə olunması nəzərdə tutulur.
Ən son xəbərləri səhifəmizdən də izləyin
