https://www.innews.az/uploads/news/2026-08/_innews_ae509b3fa670e5c75c4491e80_o.jpg
Azərbaycan Respublikasında elan edilmiş “Memarlıq və Şəhərsalma İli” və Özbəkistan Respublikasında elan olunmuş “Məhəllələrin İnkişafı və Sosial Rifah İli” çərçivəsində “Əbədi Birlik” Gənclər İctimai Birliyi tərəfindən “Müasir Şəhərlər, Güclü Məhəllələr: Azərbaycan–Özbəkistan Ortaq Baxış” adlı onlayn seminar keçirilib.
Seminarda Özbəkistanın inşaat üzrə Yeni Daşkənd, Yeni Saray və Yeni Andican dövlət layihələrinin qrup rəhbəri, sabiq deputat Azizbek Omonov iştirak edərək Azərbaycan gənclərinə Özbəkistanda və bütövlükdə Türk dünyasında urbanizasiya proseslərinin sürətləndirilməsi, müasir şəhərsalma yanaşmaları və həyata keçirilən iri dövlət layihələri barədə məlumat verib.
Azizbek Omonov çıxışında “Yeni Daşkənd” layihəsi çərçivəsində həyata keçirilən mühüm layihələrə toxunaraq, Daşkənddə Nizami Gəncəvi adına böyük universitetin inşası barədə də məlumat verib. O, həmçinin Azərbaycan və Özbəkistan arasında strateji tərəfdaşlığın, xüsusilə Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev arasında mövcud olan qardaşlıq və dostluq münasibətlərinin iki ölkənin sosial-iqtisadi inkişafına və qarşılıqlı əməkdaşlığın genişlənməsinə mühüm töhfə verdiyini vurğulayıb.
Seminarda çıxış edən “Əbədi Birlik” GİB-nin sədri Şahin Əliyev Azərbaycan və Özbəkistan arasında gənclər, şəhərsalma, ictimai diplomatiya və vətəndaş cəmiyyəti sahələrində əməkdaşlığın əhəmiyyətindən danışıb. O qeyd edib ki, Azərbaycan və Özbəkistan arasında son illərdə sürətlə inkişaf edən münasibətlər yalnız dövlətlərarası əlaqələrlə məhdudlaşmır, eyni zamanda gənclər və vətəndaş cəmiyyəti institutları arasında əməkdaşlıq üçün də yeni imkanlar yaradır.
Moderator qismində çıxış edən Serdar Şengül seminarın əsas istiqamətlərini təqdim edib, mövzu ətrafında müzakirələrin ardıcıllığını təmin edib və iştirakçılara suallar ünvanlayaraq Azərbaycan–Özbəkistan şəhərsalma və sosial inkişaf təcrübəsinin müxtəlif aspektlərinin müzakirəsinə şərait yaradıb.
Ən son xəbərləri səhifəmizdən də izləyin
