https://www.innews.az/uploads/news/2026-10/_innews_160c8c11814c55defed22cf51_o.jpg
“innews media” bildirir ki, tədbir Elm və Təhsil Nazirliyinin Riyaziyyat İnstitutunun Gənc Alim və Mütəxəssislər Şurası, “Women in Cybersecurity Azerbaijan” icması, TEXIO Academy, Sosial-İqtisadi Kollecin Tələbə Gənclər Təşkilatı və Kiber Klubunun birgə təşkilatçılığı ilə baş tutub. “CyberBridge” Texnologiya və İnnovasiya Təşəbbüsü isə Kiber Kluba dəstək göstərib.
Görüşün məqsədi gənclərin rəqəmsal savadlılığını artırmaq, müasir kibertəhdidlər və süni intellekt texnologiyalarının yaratdığı təhlükəsizlik riskləri barədə məlumatlılığını gücləndirmək, şəxsi məlumatların qorunması ilə bağlı biliklərini genişləndirmək olub.
Tədbirin moderatoru, “CyberTalk” layihəsinin aparıcısı və TEXIO Academy-nin ictimaiyyətlə əlaqələr üzrə nümayəndəsi Aida Ramiz iştirakçıları salamlayaraq proqram haqqında məlumat verib və çıxışçıları təqdim edib.
Tədbirdə Riyaziyyat İnstitutunun Gənc Alim və Mütəxəssislər Şurasının sədri, Azərbaycan Kibertəhlükəsizlik Təşkilatları Assosiasiyasının eksperti Lamiyə Nəcəfova, AZAL-da məlumat məxfiliyi və informasiya təhlükəsizliyi üzrə maarifləndirmə mütəxəssisi Mələk Hüseynova, “Cybersign” şirkətinin kibertəhlükəsizlik mütəxəssisi, TEXIO Academy-nin proqram meneceri və təlim koordinatoru Nərgiz Əliyeva, eləcə də “Güven Technology” şirkətinin informasiya təhlükəsizliyi mütəxəssisi Zəhra Şahbazova çıxış ediblər.
Lamiyə Nəcəfova rəqəmsal transformasiya şəraitində kibertəhlükəsizliyin əhəmiyyətindən, süni intellektin informasiya təhlükəsizliyinə təsirindən və yeni nəsil kiberhücumların yaratdığı risklərdən danışıb. O, süni intellektin kiberhücumların aşkarlanması və təhlükələrin proqnozlaşdırılması üçün yeni imkanlar yaratdığını, eyni zamanda, kibercinayətkarlar tərəfindən mürəkkəb hücumların həyata keçirilməsində də istifadə oluna bildiyini bildirib.
Ekspert deepfake texnologiyaları, süni intellekt əsaslı fişinq, sosial mühəndislik hücumları, rəqəmsal identikliyin saxtalaşdırılması və məlumat sızmaları kimi risklərə diqqət çəkib. Bu təhlükələrə qarşı mübarizədə elmi tədqiqatların, risklərin qiymətləndirilməsinin və rəqəmsal savadlılığın vacibliyini vurğulayıb. Həmçinin gənclərin kibertəhlükəsizlik sahəsində elmi-praktiki fəaliyyətə cəlb edilməsinin və akademik mühitlə texnologiya sektoru arasında əməkdaşlığın genişləndirilməsinin əhəmiyyətini qeyd edib.
Mələk Hüseynova fərdi məlumatların qorunması, məxfiliyin təmin edilməsi və rəqəmsal platformalarda informasiyanın təhlükəsiz idarə olunması məsələlərindən bəhs edib. O, şəxsi məlumatların paylaşılmasına məsuliyyətlə yanaşmağın və məxfilik parametrlərini düzgün tənzimləməyin vacibliyini diqqətə çatdırıb.
Nərgiz Əliyeva kibertəhlükəsizlik sahəsində nəzəri biliklərlə praktiki bacarıqların birləşdirilməsinin, müasir texnologiyaların mənimsənilməsinin və davamlı peşəkar inkişafın əhəmiyyətindən danışıb. O, gənclərin bu sahədə karyera imkanları barədə də məlumat verib.
Zəhra Şahbazova isə rəqəmsal mühitdə təhlükəsiz davranış qaydaları, hesabların qorunması, təhlükəsiz autentifikasiya üsulları və sosial mühəndislik hücumlarından müdafiə yolları haqqında danışıb. İnformasiya təhlükəsizliyinin təmin olunmasında insan amilinin və fərdi məsuliyyətin rolu vurğulanıb.
Görüş çərçivəsində tələbələrlə interaktiv sual-cavab sessiyası da keçirilib. İştirakçılar süni intellektin yaratdığı risklər, şəxsi məlumatların mühafizəsi, sosial şəbəkələrdə təhlükəsiz davranış və kibertəhlükəsizlik sahəsində karyera imkanları ilə bağlı suallarını mütəxəssislərə ünvanlayıblar. Spikerlər sualları cavablandıraraq rəqəmsal təhlükələrdən qorunma yolları və informasiya təhlükəsizliyi sahəsində peşəkar inkişaf imkanları barədə tövsiyələrini bölüşüblər.
Qeyd edək ki, tədbir gənclərin kibertəhlükəsizlik sahəsində məlumatlılığının artırılmasına, müasir rəqəmsal təhdidlər barədə biliklərinin genişləndirilməsinə və təhlükəsiz rəqəmsal davranış vərdişlərinin formalaşdırılmasına yönəlib.
Ən son xəbərləri səhifəmizdən də izləyin
