Murad Rəfiyev: “Məqsədimiz maksimum yüksək xal toplamaq və üstünlük qazanmaqdır”

Bakıda keçirilən akrobatika və aerobika gimnastikası üzrə Dünya Kuboku mərhələsində Azərbaycan millisinin üzvü Murad Rəfiyev çıxışından əvvəl açıqlama verib.

İdmançı bildirib ki, o və cütlükdə çıxış etdiyi komanda yoldaşı Daniel Abbasov yarışa ciddi hazırlaşıb və məqsədləri yüksək nəticə əldə etməkdir:

“Bu gün balans proqramı ilə çıxış edəcəyik. Vəzifəmiz maksimum yüksək xal toplamaq və rəqiblər üzərində üstünlük qazanmaqdır. Doğma azarkeşlər önündə çıxış edirik və mümkün olan ən yaxşı nəticəni göstərməyə çalışacağıq”.

Rəfiyev qeyd edib ki, Bakıda keçirilən Dünya Kuboku onlar üçün yeni təcrübə deyil və əvvəlki beynəlxalq yarışlarda da uğurlu nəticələr əldə ediblər:

“Bu, doğma divarlar arasında iştirak etdiyimiz ilk yarış deyil. Bundan əvvəl Dünya Kubokunda qızıl medal qazanmışıq. Yarışa yaxşı hazırlaşmışıq, təəssüratlar yüksək səviyyədədir və təşkilatçılıq çox yaxşıdır”.

O, turnirdə rəqabətin güclü olduğunu da vurğulayıb:

“Rəqiblər çox güclüdür. Belarus, Rusiya və Qazaxıstan idmançıları ilə yanaşı, Azərbaycanın digər kişi cütlüyü — Seymur Cəfərov və Rəsul Seyidli də yarışda iştirak edirlər. Onlar həm rəqibimiz, həm də komanda yoldaşlarımızdır. Ümid edirik ki, bütün Azərbaycan təmsilçiləri uğurlu çıxış edəcəklər”.

İdmançı yekunda məqsədlərinin ən yüksək xalları toplayaraq podium uğrunda mübarizə aparmaq olduğunu bildirib.