https://www.innews.az/uploads/news/2026-06/_innews_0341e21c3bd9a49f85d5cf507_o.jpg
Bahar Enerji Əməliyyat Şirkəti (BEOC) Azərbaycanın neft-qaz sektorunda uzunmüddətli əməliyyat təcrübəsinə malik şirkətlərdən biridir. Şirkətin əsas fəaliyyəti Xəzər dənizinin Azərbaycan sektorunda yerləşən “Bahar” və “Qum-dəniz” yataqlarının işlənməsi, mövcud hasilat imkanlarının daha səmərəli idarə olunması və yataqların uzunmüddətli inkişaf potensialının artırılması istiqamətlərini əhatə edir.
BEOC üçün hazırkı mərhələ yalnız istehsalat göstəricilərinin yaxşılaşdırılması ilə məhdudlaşmır. Şirkət eyni zamanda idarəetmə, insan kapitalı, korporativ mədəniyyət və rəqəmsal infrastruktur sahələrində daha sistemli və dayanıqlı inkişaf modelinə keçid üzərində çalışır.
“Bahar” və “Qum-dəniz” yataqlarının yenidən işlənməsi
BEOC “Bahar” və “Qum-dəniz” yataqlarının yenidən işlənməsi üzrə genişmiqyaslı layihənin icrasına başlayıb. Qısa müddət ərzində həyata keçirilən əməliyyat tədbirləri nəticəsində “Bahar” yatağında qaz hasilatının 50% artırılması layihənin ilkin və mühüm nəticələrindən biri kimi qeydə alınıb.
Layihəyə beynəlxalq təcrübəyə malik SLB şirkətinin cəlb olunması texniki qiymətləndirmə, geoloji təhlil və gələcək inkişaf ssenarilərinin daha dəqiq müəyyənləşdirilməsi baxımından mühüm əhəmiyyət daşıyır.
İlkin texniki və geoloji qiymətləndirmə mərhələləri tamamlanıb. Hazırda layihə “ Seçim et” mərhələsinin yekunlaşdırılması və növbəti “Müəyyən et” mərhələsinə keçid istiqamətində davam etdirilir. Bu mərhələdə gələcək infrastruktur ehtiyacları, quyuların potensialı və yataqların daha səmərəli istismarı imkanları qiymətləndirilir.
Yeni inkişaf mərhələsi və korporativ transformasiya
Son dövrdə BEOC-da idarəetmə yanaşmasının yenilənməsi və əməliyyat effektivliyinin artırılması məqsədilə bir sıra struktur dəyişiklikləri həyata keçirilib. Yeni rəhbərlik komandası formalaşdırılıb, idarəetmə strukturu yenilənib və şirkətin uzunmüddətli inkişaf prioritetlərini dəstəkləyən korporativ transformasiya prosesinə başlanılıb.
Bu proses çərçivəsində şirkətin vizyonu, missiyası və korporativ dəyərləri təsdiq olunub. BEOC enerji sektoruna yalnız hasilat prizmasından deyil, həm də insan kapitalı, texnoloji yenilənmə və uzunmüddətli dəyər yaratmaq baxımından yanaşır. Bu yanaşma şirkətin “Enerjidən daha çox” korporativ devizində də öz əksini tapır.
Şirkətin fəaliyyət prinsiplərinin mərkəzində təhlükəsizlik, peşəkarlıq, əməkdaşlıq və dayanıqlı inkişaf dayanır. Bu prinsiplər həm gündəlik əməliyyatlarda, həm də strateji qərarların qəbulunda əsas istiqamətverici çərçivə qismində çıxış edir.
Şirkətin insan resursları sahəsində gördüyü işlər “World HR Summit 2026” çərçivəsində “Ən Yaxşı Daxili Kommunikasiya Strategiyası” mükafatı ilə qiymətləndirilib.
BEOC həmçinin gənclərin inkişafına və bilik mübadiləsinə yönəlmiş təşəbbüsləri dəstəkləyir. Bakı Ali Neft Məktəbi, ADA Universiteti və digər təhsil müəssisələri ilə əməkdaşlıq çərçivəsində həyata keçirilən layihələr şirkətin insan kapitalına və gələcək peşəkarların inkişafına verdiyi önəmin göstəricisidir. Bu istiqamətdə BEOC tərəfindən “Enerjisən” təcrübə proqramına da start verilib. 10 həftəlik proqram çərçivəsində iştirakçılar real iş mühitində praktiki bacarıqlar qazanmaq imkanı əldə edəcək və peşəkar inkişaf yolunda mühüm təcrübə toplayacaqlar.
Rəqəmsal transformasiya
Yeni inkişaf strategiyasının mühüm istiqamətlərindən biri də rəqəmsal transformasiyadır. Bu çərçivədə BEOC-un yenilənmiş korporativ veb-saytı (beoc.az) istifadəyə verilmişdir. Yeni platforma şirkətin fəaliyyəti, layihələri, inkişaf prioritetləri və korporativ yanaşması haqqında məlumatların daha əlçatan, sistemli və şəffaf təqdim olunmasına xidmət edir.
Bu yanaşmanın davamı olaraq şirkətin sənəd dövriyyəsi prosesləri də rəqəmsal müstəviyə keçirilmişdir. Nəticədə məlumatlara çıxış daha sürətli və rahat olmuş, daxili koordinasiya güclənmiş və idarəetmə proseslərinin daha çevik təşkili üçün əlavə imkanlar yaranmışdır.
Şirkətin informasiya və kommunikasiya infrastrukturu Microsoft ekosisteminə inteqrasiya olunmuşdur. Bu inteqrasiya daxili əməkdaşlığı, məlumat mübadiləsini və tərəfdaşlarla gündəlik iş proseslərini daha sistemli və səmərəli şəkildə idarə etməyə imkan verir.
Bütövlükdə, BEOC-un həyata keçirdiyi bu transformasiya gündəliyi şirkətin əməliyyat dayanıqlılığını gücləndirməklə yanaşı, onun uzunmüddətli inkişafına, insan kapitalına və Azərbaycanın enerji sektoruna verdiyi töhfənin daha da artırılmasına xidmət edir.
Ən son xəbərləri səhifəmizdən də izləyin
