https://www.innews.az/uploads/news/2026-05/_innews_964db644db219c41d58c8312f_o.jpg
“innews media” xəbər verir ki, Bakı–Tbilisi–Bakı beynəlxalq dəmiryol marşrutu üzrə sərnişin daşımaları bərpa olunub. İlk qatar 25 may tarixində saat 23:10-da Bakı Dəmiryol Vağzalından yola düşüb.
Yeni marşrut üzrə İsveçrənin “Stadler Rail Group” şirkətinin istehsalı olan yataq tipli müasir vaqonlardan ibarət qatarlar fəaliyyət göstərəcək. Sərnişinlərə komfort, komfort+ və lüks siniflər üzrə xidmətlər təqdim olunur.
Yeni nəsil hərəkət tərkibləri yüksək komfort, müasir interyer dizaynı, fərdi xidmət imkanları və beynəlxalq standartlara uyğun səyahət şəraiti ilə seçilir.
Qatarlar hər gün Bakıdan saat 23:10-da yola düşəcək və növbəti gün saat 08:41-də Tbilisiyə çatacaq. Tbilisidən isə saat 21:00-da yola düşən qatar növbəti gün saat 06:24-də Bakıya çatacaq.
Səyahət müddətinə sərhəd və gömrük prosedurları üçün ayrılmış vaxt da daxildir. Bu müddətin 1 saatı Azərbaycan, 1 saatı isə Gürcüstan sərhəd-keçid məntəqələrində yoxlamalara sərf olunur.
Bakı–Tbilisi–Bakı qatarları Azərbaycan ərazisində Bakı Dəmiryol Vağzalı, Biləcəri, Yevlax, Gəncə, Ağstafa və Böyük Kəsik stansiyalarında, Gürcüstan ərazisində isə Qardabani stansiyası və Tbilisi Dəmiryol Vağzalında dayanacaq.
Ən son xəbərləri səhifəmizdən də izləyin
