https://www.innews.az/uploads/news/2026-10/_innews_2730e64bfc144b86157583da7_o.jpg
Son günlər Avropanın bəzi dövlətlərində dərin böhran və ixtişaşlar hökm sürür. Baş verən oxşar hadisələrin əsas səbəbi bu dövlətlərdə yaşanan sosial problemlər göstərilir. Başqa dövlətlərdə sosial problemlərin olması bəhanəsi ilə onların daxili işlərinə qarışan ölkələr öz daxilində bu cür problemlərlə üzləşirlər. Avropada baş verən ixtişaşların yatırılması üçün polis zorakılığı beynəlxalq təşkilatlar, xüsusən AP və AŞPA tərəfindən pislənmir, bəyanatlar, qətnamələr qəbul edilmir. Azərbaycanlılara qarşı soyqırımı törədən erməniləri, o cümlədən ölkəmizdə qaçaqmalçılıqla, konstitusion hüquqlarımızın dəyişdirilməsinə dövlət çevrilişi etməyə cəhd edənləri "siyasi məhbus" kimi qələmə verməyə çalışan beynəlxalq təşkilatlar Avropada etiraz zamanı həbs edilən insanları nədənsə "siyasi məhbus" adlandırmır. Nəyə görə AP və AŞPA Fransa başda olmaqla yüzlərlə insanı həbsə atdığına görə bir sıra Avropa dövlətlərinin hökumətlərini "antidemokratik hökumət" adlandırmır.
Prezident cənab İlham Əliyev hər zaman qeyd etdiyi kimi dünyada hələ də ikili standartlar hökm sürməkdədir. İstər ölkə daxilində, istərsə də xaricdə yaşayan bəzi üzdəniraq siyasətçilər hər zaman Avropadakı yüksək həyat səviyyəsindən, sosial rifahdan, təhsilin, səhiyyənin ən yüksək səviyyəsindən dəm vururlar. Əslində Avropada baş verən ixtişaş və böhran əsl həqiqəti üzə çıxardı. Avropalılar artıq sosial vəziyyətin ağırlığına, təhsilin, səhiyyənin inkişafa deyil, tənəzzülə uğramasına qarşı küçələrə axışırlar, etiraz edirlər. Başqa dövlətləri tolerantlıq və multikultural dəyərlərə hörmət etməməkdə günahlandıran Fransada tolerantlıqdan söhbət belə gedə bilməz. Bu ölkədə radikal millətçi ideyalar artıq dövlət siyasətinə çevrilməkdədir. Fransa və bəzi dövlətlərin Azərbaycanın daxili işlərinə qarışmağa nə hüquqi, nə də mənəvi ixtiyarı yoxdur. Azərbaycan dünyada tam müstəqil, siyasi, iqtisadi siyasət həyata keçirən, qlobal səviyyədə kifayət qədər nüfuz qazanan bir dövlətdir.
Prezident cənab İlham Əliyev VII Ümumdünya Mədəniyyətlərarası Dialoq Forumunun açılışında qeyd etdiyi kimi Azərbaycan tam müstəqil siyasət həyata keçirdiyi üçün bütün dünyada böyük bir hörmət qazanmışdır. Azərbaycan öz gücünə işğal altında olan torpaqlarını işğaldan azad edən, böyük siyasi, iqtisadi, hərbi gücə malik, dünya üçün olduqca önəmli bir dövlətdir. Ən əsası ölkəmizdə stabillik, bütün sahələrdə yüksək inkişaf, milli birlik hökm sürür.
Kamilə Əliyeva
Bakı Dövlət Universitetinin kafedra müdiri, professor
Ən son xəbərləri səhifəmizdən də izləyin
