https://www.innews.az/uploads/news/2026-05/_innews_6f134b3ed0f2b4dd197ec6fb4_o.jpg
Bu gün Su İdmanı Sarayı-nın üzgüçülük üzrə məşqçisi Əbdül-zadə Tubu xanım ilə həmsöhbət olduq. 15 ildən artıq peşəkar fəaliyyətə malik olan məşqçi, uzun illərdir uşaqların və yeniyetmələrin fiziki, texniki və psixoloji inkişafı istiqamətində çalışır. Onun rəhbərliyi altında hazırlanan idmançılar müxtəlif yerli və respublika yarışlarında uğurlu nəticələr əldə edərək ölkə idmanında öz sözlərini deməyə başlayıblar.
- Üzgüçülüyün uşaqların sağlamlığına, xüsusilə boy artımı və düzgün qamətin formalaşmasına hansı faydaları var?
- Üzgüçülük uşaqların fiziki inkişafına ən müsbət təsir göstərən idman növlərindən biridir. Su mühitində hərəkət zamanı bədənin bütün əzələ qrupları aktiv şəkildə işləyir ki, bu da düzgün qamətin formalaşmasına kömək edir. Eyni zamanda üzgüçülük onurğa sütununu möhkəmləndirir, əzələ balansını inkişaf etdirir və skelet sisteminə düşən yüklənməni azaldır.
Bundan əlavə, müntəzəm üzgüçülük tənəffüs sistemini gücləndirir, ürək-damar dözümlülüyünü artırır və uşağın ümumi fiziki inkişafını dəstəkləyir. Boy artımına isə dolayı yolla müsbət təsir göstərir, çünki düzgün bədən duruşu və aktiv fiziki inkişaf üçün əlverişli şərait yaradır.
- Valideynləri ən çox maraqlandıran məqamlardan biri yaş həddidir. Peşəkar nöqteyi-nəzərdən uşaqların üzgüçülüyə başlaması üçün ən ideal yaş dövrü hansıdır və bu erkən başlanğıc onlara hansı üstünlükləri qazandırır?
- Peşəkar yanaşmada ideal başlanğıc yaşı 5–7 yaş arası hesab olunur. Bu dövrdə uşaqlar suya daha tez uyğunlaşır və qorxu hissi daha asan aradan qalxır. Erkən yaşda başlanğıc onlara düzgün texnikanı təbii şəkildə mənimsəməyə imkan verir. Bu da gələcəkdə daha yüksək idman nəticələri üçün möhkəm baza yaradır.
- Yarışlara hazırlıq dövründə idmançıların həm fiziki, həm də psixoloji dözümlülüyünü artırmaq üçün hansı metodikalardan istifadə edirsiniz?
- Hazırlıq prosesi iki əsas hissəyə bölünür: fiziki və psixoloji. Fiziki hazırlıqda biz interval məşqlər, sürət və dözümlülük proqramlarından istifadə edirik. Psixoloji hazırlıqda isə motivasiya söhbətləri, yarış simulyasiyaları və vizuallaşdırma texnikaları tətbiq olunur. Məqsəd idmançının həm bədən, həm də psixoloji olaraq yarışa tam hazır olmasıdır.
- Ölkəmizdə üzgüçülüyün bugünkü vəziyyətini və gələcək inkişaf perspektivlərini bir məşqçi kimi necə qiymətləndirirsiniz?
- Son illərdə inkişaf var, bu sevindirici haldır. İnfrastruktur və şərait getdikcə yaxşılaşır. Lakin hələ də potensialımız tam istifadə olunmayıb. Daha sistemli hazırlıq proqramları və kütləvi idman mədəniyyətinin gücləndirilməsi vacibdir. Mən inanıram ki, düzgün yanaşma ilə gələcəkdə beynəlxalq səviyyədə daha çox uğur əldə edə bilərik.
- Yaxın beş il ərzində tələbələrinizin hansı səviyyəli turnirlərdə ölkəmizi təmsil etməsini hədəfləyirsiniz?
- Əsas məqsədimiz idmançılarımızın yaxın illərdə Avropa və dünya səviyyəli yeniyetmə və gənclər turnirlərində ölkəmizi layiqincə təmsil etməsidir. Uzunmüddətli hədəfimiz isə onların gələcəkdə böyüklər arasında da uğurlu çıxış edərək beynəlxalq arenada yüksək və sabit nəticələr əldə etmələridir.
- Əgər üzgüçülüyü üç sözlə ifadə etməli olsanız, bu hansı sözlər olar?
- Mənim üçün üzgüçülük intizam, dözümlülük və iradədir.
Sonda məşqçi Əbdül-zadə Tubu xanım vurğuladı ki, üzgüçülük yalnız idman növü deyil, həm də uşaqlarda sağlam həyat tərzi, intizam və özünəinam formalaşdıran mühüm inkişaf məktəbidir. O, valideynlərə uşaqların erkən yaşlardan idmana yönləndirilməsini tövsiyə edərək bildirdi ki, düzgün istiqamətləndirilən hər bir uşaq gələcəyin uğurlu idmançısına çevrilə bilər.
Maraqlı və səmimi müsahibə üçün Sizə təşəkkür edirik. Gənc idmançıların inkişafına verdiyiniz töhfələrdə uğurlar arzulayır, gələcək fəaliyyətinizdə yeni nailiyyətlər diləyirik.
Ən son xəbərləri səhifəmizdən də izləyin
