https://www.innews.az/uploads/news/2026-03/_innews_3aeca11a190d935a9b529175f_o.jpg
Azərbaycan Respublikasının Özbəkistan Respublikasındakı Səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzində “Novruz – türk dünyasının birlik və qardaşlıq bayramıdır” şüarı altında Novruz bayramı münasibətilə bayram konserti təşkil edilmişdir.
Tədbirdə ictimaiyyət nümayəndələri, mədəniyyət və incəsənət xadimləri, tələbələr, jurnalistlər və Daşkənddə yaşayan azərbaycanlı soydaşlarımız iştirak ediblər.
Azərbaycan Mədəniyyət Mərkəzinin direktoru Akif Marifli qeyd edib ki, Novruz bayramı türk dünyasını birləşdirən ortaq mənəvi dəyərlərin və qədim ənənələrin parlaq ifadəsidir. Onun sözlərinə görə, əsrlər boyu qeyd olunan bu bayram xalqlar arasında dostluq, həmrəylik və qarşılıqlı ehtiram kimi dəyərlərin qorunub saxlanmasına xidmət edib. Direktor bildirib ki, Azərbaycan və Özbəkistan xalqlarını birləşdirən məhz belə ortaq mədəni irs iki ölkə arasında münasibətlərin möhkəmlənməsində mühüm rol oynayır. O vurğulayıb ki, bu gün Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev tərəfindən həyata keçirilən siyasət nəticəsində iki ölkə arasında dostluq və əməkdaşlıq münasibətləri, o cümlədən mədəni-humanitar əlaqələr ardıcıl şəkildə inkişaf edir.
Tədbirdə, həmçinin Özbəkistan Respublikası Dövlət Gömrük Komitəsinin Gömrük İnstitutunun rəisi Mi̇razam Xamrayev və Yunus Rəcəbiy adına Özbək Milli Musiqi Sənəti İnstitutunun rektoru Eldor Şermanov çıxış edərək iştirakçıları Novruz bayramı münasibətilə təbrik ediblər. Onlar bu bayramın xalqları birləşdirən mühüm mənəvi dəyər olduğunu qeyd edərək, Azərbaycan və Özbəkistan arasında dostluq münasibətlərinin daha da möhkəmləndiyini vurğulayıblar.
Konsert proqramında Azərbaycanın və Özbəkistanın Xalq artisti Gülyanaq Məmmədova, ifaçılar Fəxri Kazım-Nicat və Kamran Məmmədəliyev, Özbəkistanın əməkdar artistləri İlyos Arabov və Mоhiçehra Şamuratova, eləcə də digər ifaçılar və musiqi ansamblları iştirak ediblər. Proqram çərçivəsində Azərbaycan və Özbəkistan musiqi nümunələri səsləndirilib, müxtəlif musiqi ansamblları tərəfindən xalq və estrada janrlarını əhatə edən ifalar təqdim olunub. Konsertdə hər iki xalqın musiqi ənənələrini əks etdirən müxtəlif kompozisiyalar səsləndirilib, proqram Azərbaycan və Özbəkistanın musiqi mədəniyyətini təmsil edən nömrələrlə davam etdirilib.
Tədbir çərçivəsində Azərbaycan Mədəniyyət Mərkəzinin “Xarı bülbül” teatr truppası tərəfindən Azərbaycan teatr sənətinin klassik ənənələrini əks etdirən səhnə kompozisiyaları təqdim olunub.
Konsert proqramında Azərbaycan Mədəniyyət Mərkəzinin “Qarabağ Zəfəri” rəqs ansamblı da çıxış edərək Azərbaycan xalq rəqslərindən ibarət xoreoqrafik kompozisiyalar nümayiş etdirib.
Ən son xəbərləri səhifəmizdən də izləyin
