Mediatorlar Türkiyə Cümhuriyyətinin Macarıstandakı səfərliyində olublar

Azərbaycan Respublikasının Mediasiya Şurasının mediatorlardan ibarət nümayəndə heyəti Türk Dünyası Mediatorlar Birliyi çərçivəsində, Azərbaycan Respublikasının Diasporla iş Üzrə Dövlət Komitəsinin təşkilati dəstəyi ilə 24 aprel 2024-cü il tarixində Türkiyə Cümhuriyyətinin Macarıstanın paytaxtı Budapeşt şəhərindəki səfirliyini ziyarət edib.

Nümayəndə heyətini qəbul edən səfir xanım Gülşən Karanis Ekşioğlu mediatorlarla səfirlikdə görüşündən məmnun olduğunu qeyd edib. Görüş zamanı mediatorların səfərinin məqsədi, əldə edilmiş uğurlar, təcrübə mübadiləsi proqramı barədə səfirin diqqətinə məlumat çatdırılıb. Türk Dünyası Mediatorlar Birliyinin sədri Yakup Erikel səmimi qəbula görə xanım Gülşən Karanis Ekşioğluna öz təşəkkürlərini bildirib. Azərbaycan Respublikası Mediasiya Şurasının sədri Nadir Adilov öz növbəsində xanım Gülşən Karanis Ekşioğluna təşəkkürlərini çatdırıb və Şuranın fəaliyyəti barədə səfirə məlumat verib.

Daha sonra xanım Gülşən Karanis Ekşioğluna Türk Dünyası Mediatorlar Birliyinin sədri Yakup Erikel və Mediasiya Şurasının sədri Nadir Adilov tərəfindən xatirə hədiyyələr təqdim edilib.

Sonda Azərbaycan və Türkiyədən olan nümayəndə heyəti səfirlə xatirə şəkli çəkdirib.