https://www.innews.az/uploads/news/2026-11/_innews_29195a982a5c2f6cc5dcb2dc1_o.jpg
Dini Qurumlarla İş üzrə Dövlət Komitəsi, tabeliyində fəaliyyət göstərən Mənəvi Dəyərlərin Təbliği Fondu və Azərbaycan İlahiyyat İnstitutunun birgə təşkilatçılığı ilə noyabrın 3-4-də Mingəçevir şəhərində “Peşəkar dini fəaliyyət: müasir çağırışlar kontekstində” mövzusunda ikigünlük seminar-treninq keçirilib.
Peşəkar dini xidmətin müasir tələblərə uyğunlaşdırılmasını təmin etmək məqsədilə keçirilən təlimlərə din xadimləri, icma sədrləri və üzvləri cəlb olunublar.
Mənəvi Dəyərlərin Təbliği Fondunun icraçı direktoru Vüsal Göyüşöv çıxış edərək müasir dövrdə din xadimlərinin fəaliyyətinin yeni çağırışlara uyğun qurulmasının vacibliyinə diqqət çəkib. O bildirib ki, dəyişən ictimai münasibətlər və informasiya mühitinin yaratdığı reallıqlar din xadimlərindən yüksək peşəkarlıq, çevik yanaşma və davamlı bilik mübadiləsi tələb edir. Bu baxımdan dini maarifləndirmə işinin müasir tələblərə uyğun təşkili, cəmiyyətlə sağlam ünsiyyətin qurulması, eləcə də milli-mənəvi dəyərlərin qorunması və təbliği din xadimlərinin əsas vəzifələri sırasında yer alır.
Azərbaycan İlahiyyat İnstitutunun rektoru, ilahiyyat üzrə fəlsəfə doktoru, dosent Aqil Şirinov “Dini radikalizmlə mübarizədə din xadimlərinin missiyası” başlıqlı təqdimatında radikalizmin qarşısının alınması və zərərli təsirlərinin aradan qaldırılmasında din xadimlərinin üzərinə mühüm mənəvi və strateji məsuliyyət düşdüyünü əsas məqam kimi səciyyələndirib. Bildirib ki, onların əsas vəzifələrindən biri də cəmiyyətdə qütbləşmə meyillərinin azaldılmasına, qarşılıqlı anlaşma və həmrəyliyin möhkəmləndirilməsinə töhfə verməkdir. Radikallaşma prosesində qapalı şəbəkələrin və sosial medianın yaratdığı imkanlardan danışan rektor din xadimlərini rəqəmsal məkanda yalnız müşahidəçi mövqeyində qalmamağa, əksinə, fəal maarifləndirmə işi aparmağa, keyfiyyətli və etibarlı məzmun yaratmaqla gənclərin virtual təhlükəsizliyinin qorunmasına dəstək göstərməyə çağırıb.
Azərbaycan İlahiyyat İnstitutunun İslamşünaslıq kafedrasının müdiri, fəlsəfə üzrə fəlsəfə doktoru, dosent Əhməd Niyazov çıxışında “Dialoq və dini-mənəvi xidmət” istiqamətində fikirlərini bölüşüb. O bildirib ki, din xadimləri fəaliyyətlərində formal icraçılıqla kifayətlənməməli, səmərəlilik, mənəvi məsuliyyət və peşəkar inkişaf prinsiplərini rəhbər tutaraq cəmiyyətə fayda verməyə çalışmalıdırlar. Xüsusilə gənclərlə yanaşı, müxtəlif sosial qruplarla iş zamanı fərdi yanaşmanın tətbiqi, onların ehtiyac və gözləntilərinin nəzərə alınması, eləcə də qarşılıqlı anlaşmaya əsaslanan dialoq mühitinin formalaşdırılması mühüm əhəmiyyət daşıyır.
“Din xadimlərinin fəaliyyətində səmərəliliyin artırılması” mövzusunda təqdimatla çıxış edən Mənəvi Dəyərlərin Təbliği Fondunun icraçı direktorunun müavini Ceyhun Əliyev bu sahədə kəmiyyət göstəricilərindən daha çox keyfiyyət meyarlarının əsas götürülməsinin vacibliyini vurğulayıb. Bildirib ki, din xadiminin cəmiyyətə təsir imkanları yalnız söylədiyi fikirlərlə deyil, eyni zamanda şəxsi davranışı, həyat tərzi və nümayiş etdirdiyi nümunə ilə müəyyən olunur. C.Əliyev ədalət, mərhəmət və təvazökarlıq kimi mənəvi dəyərləri təbliğ edən şəxslərin, ilk növbədə, bu prinsiplərə öz davranış və fəaliyyətlərində sadiq qalmalarının əhəmiyyətini diqqətə çatdırıb.
Bakı İlahiyyat Kollecinin direktor müavini, fəlsəfə üzrə fəlsəfə doktoru Faiq Əhmədzadə “Sosial media və dini maarifləndirmə” barədə danışaraq rəqəmsal platformalarda fərqli din və inanc nümayəndələrinə münasibətdə həssas yanaşmanın, eləcə də hər hansı məlumatı paylaşmazdan əvvəl onun mənbəyinin etibarlılığının yoxlanılmasının zəruri olduğunu bildirib. Qeyd edib ki, din xadimləri sosial şəbəkələrdə dəqiq və etibarlı məlumatları düzgün üslubda, anlaşıqlı şəkildə təqdim etməklə dini maarifləndirmənin keyfiyyətini yüksəldə və cəmiyyətin məlumatlandırılmasına xidmət edə bilərlər.
Din xadimlərinin peşəkar səriştələrinin artırılması və müasir çağırışlara uyğun baxışlarının formalaşdırılması məqsədi daşıyan seminar-treninq müzakirələrlə yekunlaşıb.
Ən son xəbərləri səhifəmizdən də izləyin
