https://www.innews.az/uploads/news/2023-02/_innews_3f810b5ce7463e561eb5fa592_o.jpg
Türkün tökülən qanları bihudə gedərmi?
Diqqətlə düşün, yoxsa bu qan həpsi hədərmi?
Yazıya ədəbiyyat tarixinin – ümumən Türk dünyasının ən ünlü siması Məhəmməd Hadinin dilimizdə nəğməyə çevrilən "Türkün nəğməsi" ilə başladım. Orta məktəb vaxtlarından öyrəndiyimiz, dilimizin əzbərinə çevrilən şeir hər sətrilə möhtəşəmdir, ucadır, himmət və niyyətimiz alidir...
Uğrunda mübarizə aparmış, şəhidlər vermiş igid, qəhrəman oğulların yaşadığı və yaşatdığı, müqəddəs bildiyi yerdir – Vətən torpağı. O torpaq ki, illərdir, hətta əsrlərdir hərbi-strateji, coğrafi mövqeyinə, bitməz-tükənməz sərvətinə görə düşmənlərin məkrli planları, min hiyləsi ilə üzbəüz qalıb.
Ər və ərənlərimiz qara donlu kafirləri hər zaman beli üstə qoyub. İgidlərimiz Vətənin daşına belə göz dikənlərin daşlarını daş üstə qoymayıb.
Azərbaycanın azadlığı uğrunda şəhid olan, qəhrəman, mərd oğullar hər zaman olub və olacaqdır. Bunlardan biri də Zeynalovlar ailəsinin böyük övladı Azaddır.
Azad 1987-ci il yanvarın 7-də Naxçıvan Muxtar Respublikasının Şərur rayonu, Çomaxtur kəndində doğulmuşdur. Onun özündən kiçik bir bacısı və qardaşı vardır.
Azad 2002-ci ildə Cəmşid Naxçıvanski adına hərbi liseyə imtahan verir. On beş yaşlı Azadın ilk addımında sanki uğursuzluqla onunla birgə addımlayırdı. Beləki həmin vaxt kənddə nəqliyyat problemi olduğundan Azad imtahandan kənar qalmaq qorxusu yaşayır. Ancaq stresə, çətinliyə baxmayaraq imtahana çatır və uğur əldə edir.
2005-ci ildə Bakıda Heydər Əliyev adına Hərbi Akademiyaya göndərilir. 2009-cu il 22 iyunda "leytenant" hərbi rütbəsinə layiq görülür. 2010-cu il 23 iyun tarixində 942 nömrəli hərbi hissənin mühafizə bölüyündə "komandir" vəzifəsinə yüksəlir.
2013-cü ildə "baş leytenant" hərbi rütbəsi alır. Daha sonra 2017-ci ildən çiyinlərində "kapitan" hərbi rütbəsini şərəflə daşıyır – Azad kapitan!
Azad Zeynalov sentyabrın 27-də başlayan 2-ci Qarabağ müharibəsinə yollanır. Həyatının çiçəklənən çağında xalqı, torpağı uğrunda qəhrəmancasına şəhidlik məqamına ucalır.
Ailəsi Azadla bağlı danışarkən bir tərəfdən kədərlənir, bir yandan qürurlanır, digər tərəfdən də onun həyat eşqilə alışıb-yanmasını, duzlu-məzəli sözlərini xatırladıqca çöhrələrində təbəssüm yaranırdı. Ailəsi deyir ki, Azadın unuda bilməyəcəyimiz kəlmələrindən biri də qardaşı Hüseynə verdiyi sual idi: "Gələcəkdə Aslan üçün nə edərsən?" Görəsən bu sualı verərkən nələr keçirirdi ağlından? Görəsən bilirdimi ki, üç il sonra canından çox sevdiyi Aslanı Hüseynə əmanət edəcək?
Anası Səkinə xanım həmişə deyir ki, "Balam müharibəyə gedəndən mənim ürəyimə ağrı dolmuşdu, hiss edirdim ki, Azadım ordan gələ bilməyəcək, mən bir də onu bağrıma basa bilməyəcəm, bir də Azadımın dilindən "ana" kəlməsini eşitməyəcəm".
2 oktyabrda oğlu Aslan və həyat yoldaşı Cəvahir xanıma görüntülü zəng etmişdi, söhbət əsnasında Azadın çox kövrəkliyini hiss edirdilər. "Sən saydığını say, gör fələk nə sayır". Düz 10 gündən sonra düşmən gülləsinə tuş gələcəkdi.
6 oktyabr Azad son zənglərindən birini etdi. O, zəngdə heç vaxt görməyəcəyi, qucağına ala bilməyəcəyi, ata sevgisindən ömürlük məhkum olan və may ayında doğulacaq körpəsinin necə olduğunu soruşdu.
Azad oktyabrın 11-i Füzuli istiqamətində gedən döyüşlərdə yaralı əsgərini döyüş meydanından çıxararkən güllə yarası alaraq ağır yaralandı: 14 gün reanimasiyada ölümlə mübarizə apardı. Sonda ölüm Azada qalib gəldi.
26 oktyabr kapitan Azad Zeynalov şəhidlik zirvəsinə ucalır.
Ruhun şad olsun, kapitan! Əbədiyyət ünvanında rahat uyu, Azad Zeynalov!
Uğrunda canından keçdiyin torpaq artıq AZADDIR!
Cənnətzadə Lamiyə, BDU-nun Jurnalistika fakültəsinin tələbəsi
Ən son xəbərləri səhifəmizdən də izləyin
