https://www.innews.az/uploads/news/2026-11/_innews_d2bbc2bffb4d4c1b576bd0f4f_o.jpg
Ataların doğuşdan sonrakı dövrdə və erkən uşaqlıq mərhələsində övladlarının həyatında daha fəal iştirakını təşviq edən “Şüurlu Ata – Sağlam Gələcək” maarifləndirici təlim-forumu Masallı rayonunda keçirilib.
14 noyabr 2026-cı il tarixində Masallı rayonunda Azərbaycan Respublikası Gənclər Fondunun dəstəyi ilə “Şüurlu Ata – Sağlam Gələcək” adlı maarifləndirici təlim-forum təşkil olunub.
Layihənin yaradıcısı, təşəbbüskarı və rəhbəri Əsmər Sadıqzadədir. Layihə ailə daxilində valideyn məsuliyyətinin bölüşdürülməsi, ataların doğuşdan sonrakı dövrdə ana və uşağın həyatında daha fəal iştirakının təşviqi, eləcə də cəmiyyətdə şüurlu atalıq anlayışının formalaşdırılması məqsədilə hazırlanıb.
Tədbirin əsas məqsədi atalıq məsuliyyətinə yalnız maddi təminat prizmasından deyil, həm də emosional iştirak, uşağın inkişafında fəal rol və ana ilə birgə valideynlik məsuliyyəti kontekstindən yanaşılmasının vacibliyini diqqətə çatdırmaq olub.
Təlim-forumda tibbi və psixoloji istiqamətlər üzrə mütəxəssislər iştirakçılarla öz bilik və təcrübələrini bölüşüblər. Çıxış edən mütəxəssislər arasında cərrah-ginekoloq Xatirə Şeyxzadə, uşaq cərrahı Dr. Cavid Abdullayev və psixoloq Süsən Axundova yer alıblar.
Tədbir çərçivəsində ata məsuliyyəti, ana və uşaq sağlamlığı, doğuşdan sonrakı dövrdə ailə dəstəyi, ata-uşaq münasibətlərinin psixoloji əsasları və ailədə valideynlər arasında məsuliyyət bölgüsü kimi mövzulara toxunulub. İştirakçılara nəzəri məlumatlarla yanaşı, praktik maarifləndirmə imkanları da təqdim edilib.
Layihənin reallaşdırılmasında Məlhəm Beynəlxalq Hospital, Bioloji Təbabət İnteqrativ Müalicə Mərkəzi, Şəkərbala Uşaq Bağçası və Masallı Gənclər Evi tərəfdaş qismində iştirak ediblər.
Sosial məsuliyyət və sağlamlıq maarifləndirilməsinə dəstək çərçivəsində iştirakçılara Məlhəm Beynəlxalq Hospital və Bioloji Təbabət tərəfindən tibbi xidmətlər üzrə 20 faiz endirim kuponları təqdim olunub.
“Şüurlu Ata – Sağlam Gələcək” layihəsi ataların ailə həyatında iştirakını artırmaqla yanaşı, valideynlik məsuliyyətinin ortaq dəyər kimi qəbul edilməsinə töhfə verməyi hədəfləyir.
Layihənin rəhbəri Əsmər Sadıqzadənin təşəbbüsü ilə reallaşdırılan bu tədbir ailə və uşaq sağlamlığı mövzusunda müxtəlif peşə sahiblərini, valideynləri və gələcək valideynləri bir araya gətirərək cəmiyyət üçün aktual olan məsələlərin müzakirəsinə imkan yaradıb.
Layihənin əsas hədəflərindən biri bu istiqamətdə maarifləndirmə fəaliyyətini genişləndirmək, təşəbbüsün əhatə dairəsini Masallı ilə məhdudlaşdırmayaraq Azərbaycanın digər bölgələrinə də çatdırmaqdır.
Ən son xəbərləri səhifəmizdən də izləyin