https://www.innews.az/uploads/news/2026-11/_innews_b7f0782a70f94c3cd5b93070d_o.jpg
Mercedes pilotu Kimi Antonelli Ostində keçirilən ABŞ Qran-prisinin qalibi olub. Bu, italiyalı pilotun cari mövsümdə doqquzuncu qələbəsidir. Şarl Lekler (Ferrari) yarışı ikinci, Maks Ferstappen (Red Bull) isə üçüncü yerdə başa vurub.
ABŞ Qran-prisi 2022-ci ildən sonra ilk dəfə sprint yarışı keçirilmədən baş tutub. Sıralama turunda çempionatın lideri Antonelli ən yaxşı nəticəni göstərərək poulu qazanıb. İlk cərgədən onunla birlikdə Ferstappen, ikinci cərgədən isə İsaak Hadjar və Lekler start götürüblər.
Antonelli startda liderliyini qoruyub. Lekler Ferstappeni ötərək ikinci yerə yüksəlsə də, Red Bull pilotu ilk dövrənin sonunda mövqeyini geri qaytarıb. Lyuis Hemilton da uğurlu start götürərək Hadjarı geridə qoyub.
İlk pit-stop dalğasından sonra liderlik uğrunda mübarizə daha da gərginləşib. Əsas rəqiblərindən daha erkən pit-stop edən Ferstappen birinci yerə yüksəlib, Lekler isə ikinci mövqeyə çıxıb. Antonelli pit-stopdan sonra trasa üçüncü yerdə qayıdıb.
32-ci dövrədə Ferstappen ikinci pit-stopunu edib. Ön sağ təkərin dəyişdirilməsi zamanı yaranan problem niderlandlı pilotun əlavə vaxt itirməsinə səbəb olub. Bundan sonra Lekler qısa müddətə liderliyə yüksəlib, lakin Antonelli Ferrari pilotunu ötərək yenidən birinci yerə çıxıb.
Yarışın son hissəsində əsas mübarizə podium uğrunda gedib. 47-ci dövrədə Ferstappen və Lekler ardıcıl olaraq Lando Norrisi ötərək ikinci və üçüncü yerlərə yüksəliblər. İki dövrə sonra Lekler Ferstappeni də geridə qoyaraq ikinci mövqeyə çıxıb. Hemilton isə Norrisi ötərək dördüncü yerə yüksəlib.
Finişə bir neçə dövrə qalmış Valtteri Bottasın bolidinin trasda dayanması səbəbindən virtual təhlükəsizlik avtomobili rejimi tətbiq olunub. Mübarizə bərpa edildikdən sonra liderlər arasında mövqelər dəyişməyib.
Antonelli finişədək liderliyini qoruyaraq mövsümdə doqquzuncu qələbəsini qazanıb. Lekler ikinci, Ferstappen isə üçüncü yeri tutub. Hemilton yarışı dördüncü, Norris isə beşinci pillədə tamamlayıb.
Formula 1 üzrə dünya çempionatı gələn həftə Mexiko Qran-prisi ilə davam edəcək. Kimi Antonelli bu mərhələdə vaxtından əvvəl dünya çempionu titulunu təmin edə bilər.
www.bakucitycircuit.com
Ən son xəbərləri səhifəmizdən də izləyin
