https://www.innews.az/uploads/news/2026-10/_innews_e6725c7653fa65e7b897c13a4_o.jpg
Özbəkistan Respublikasının Xarəzm vilayətinin qədim Xivə şəhərində yerləşən “Arda Xiva” kompleksində “Gilamlar jilosi” II Beynəlxalq xalça sərgi-festivalı keçirilmişdir. Tədbirin əsas məqsədi minillik xalçaçılıq ənənələrini qorumaq və təbliğ etmək, milli naxışların rəmzi mənalarını və onların müasir dizaynla vəhdətini geniş ictimaiyyətə təqdim etmək olmuşdur. Festivalda Azərbaycanla yanaşı, Özbəkistan, Qazaxıstan, Qırğızıstan, Türkmənistan, İran, Tacikistan və Əfqanıstandan olan sənətkarlar və sahə mütəxəssisləri iştirak etmiş, öz xalça nümunələrini nümayiş etdirmişlər.
Tədbirdə çıxış edən Azərbaycan Respublikasının Özbəkistan Respublikasındakı Səfirliyinin tabeliyində Heydər Əliyev adına Azərbaycan Mədəniyyət Mərkəzinin direktoru, tarix üzrə fəlsəfə doktoru Akif Marifli Azərbaycan ilə Özbəkistan arasındakı əbədi dostluq və strateji tərəfdaşlıq münasibətlərindən bəhs edərək, bu əlaqələrin inkişafında mədəni-hümanitar əməkdaşlığın rolunu xüsusi vurğulamışdır. O, xalçaçılıq sənətinin xalqlarımızın mədəni irsində mühüm yer tutduğunu qeyd edərək, minilliklərdən süzülüb gələn bu irsin gələcək nəsillərə ötürülməsində belə tədbirlərin əhəmiyyətini diqqətə çatdırmışdır. O, 2026-cı ildə görkəmli xalçaçı-rəssam və sənətşünas alim Lətif Kərimovun 120 illik yubileyinin qeyd olunduğunu vurğulayaraq, sənətkarın Azərbaycan xalçaçılığının inkişafına verdiyi töhfələrdən və irsinin türk xalqlarının xalça sənətindəki əhəmiyyətindən bəhs etmişdir.
Təqdimat mərasimində Özbəkistandakı Heydər Əliyev adına Azərbaycan Mədəniyyət Mərkəzinin təşkilatçılığı ilə Qarabağ, Şirvan, Gəncə, Qazax, İrəvan, Dərbənd, Təbriz və Quba xalçaçılıq məktəblərinə məxsus nümunələrin yer aldığı “Lətif Kərimov – Azərbaycan xalça sənətinin böyük ustadı” adlı sərgi nümayiş etdirilmişdir. Sərgi çərçivəsində Lətif Kərimovun yaradıcılığı və Azərbaycan xalça irsinin xüsusiyyətləri barədə ziyarətçilərə məlumat verilmiş, nümunələr yerli sakinlər və şəhərin qonaqları tərəfindən böyük maraqla qarşılanmışdır.
Ən son xəbərləri səhifəmizdən də izləyin
