https://www.innews.az/uploads/news/2026-10/_innews_1badf64fdeb8f009a59b88cb3_o.jpg
"Biznes Mərkəzi Klubu" tərəfindən ölkənin biznes mühitinin inkişafı və sahibkarlar arasında işgüzar əlaqələrin möhkəmləndirilməsi məqsədilə təşkil olunan "Business Party" tədbiri 150-dən çox aparıcı sahibkar, biznes nümayəndəsi və dövlət qurumlarının rəsmilərinin iştirakı ilə yüksək səviyyədə baş tutdu.
Tədbirin rəsmi hissəsi "Biznes Mərkəzi Klubu"nun İdarə Heyətinin sədri Rüfət Nadirlinin açılış nitqi ilə start götürdü. Rüfət Nadirli öz çıxışında klubun fəaliyyət istiqamətləri, yerli biznes ekosisteminə töhfələri və gələcək strateji hədəfləri barədə ətraflı məlumat verərək, bu cür görüşlərin B2B əməkdaşlıqların qurulmasında müstəsna rol oynadığını vurğuladı.
Gecənin mühüm tərkib hissəsi olaraq, tərəfdaşlığın genişləndirilməsi və birgə layihələrin icrası məqsədilə "Biznes Mərkəzi Klubu" ilə "FAYDA" İş Adamları Platforması, eləcə də "Azərbaycan Gömrük Təmsilçiliyi və Logistika Şirkətlərinin Assosiasiyası" (AGTL) arasında rəsmi əməkdaşlıq memorandumu imzalandı.
İmzalanma mərasimindən sonra "FAYDA" İş Adamları Platformasının sədri Sakit Səmədov çıxış edərək, bu əməkdaşlığın hər iki platformanın üzvləri üçün yeni imkanlar açacağını, birgə layihələrin ölkədə sahibkarlıq mühitinin güclənməsinə və biznes subyektləri arasında sinergiyanın artmasına xidmət edəcəyini diqqətə çatdırdı. Ardınca AGTL-in sədri Vüsal Qasımov çıxış edərək, xüsusilə logistika və gömrük təmsilçiliyi sahəsindəki mövcud imkanların və təcrübə mübadiləsinin sahibkarlar üçün əhəmiyyətindən bəhs edərək, bu strateji tərəfdaşlığın biznes proseslərinin daha effektiv təşkilinə və sahələrarası inteqrasiyaya böyük töhfə verəcəyini vurğuladı. İmzalanan sənədlər tərəflər arasında qarşılıqlı təcrübə mübadiləsi və səmərəli biznes platformasının formalaşdırılmasına xidmət edəcək.
Bununla yanaşı, tədbirdə innovativ yeniliklərə də yer verildi. "IT BRAINS ACADEMY" MMC-nin təsisçi-direktoru Orxan Məmmədov tərəfindən "Biznes Mərkəzi Klubu"nun yeni rəqəmsal platforması olan BMK.az saytının geniş təqdimatı keçirildi. Təqdimat zamanı saytın funksionallığı, sahibkarlar üçün yaratdığı imkanlar və rəqəmsal şəbəkələşmənin üstünlükləri iştirakçıların diqqətinə çatdırıldı.
Tədbirin bədii hissəsində iştirakçıların asudə vaxtının səmərəli təşkili üçün rəngarəng musiqili proqram və interaktiv yarışma keçirildi. Gərgin və maraqlı mübarizə şəraitində keçən yarışmanın qaliblərinə təşkilatçılar və tərəfdaşlar tərəfindən xüsusi xatirə hədiyyələri təqdim olundu.
"Biznes Mərkəzi Klubu" olaraq dəvətimizi qəbul edib tədbirdə iştirak edən bütün qonaqlara, dövlət nümayəndələrinə və tərəfdaş qurumlara dərin minnətdarlığımızı bildirir, gələcək fəaliyyətlərində uğurlar arzulayırıq.
Ən son xəbərləri səhifəmizdən də izləyin
