Levandovski Ronaldonu geridə qoydu

Robert Levandovski üçün Rumıniya ilə qarşılaşma xüsusi əhəmiyyət daşıdı. Təcrübəli hücumçu het-trik edərək Polşanın 6:0 hesablı darmadağınında əsas pay sahibi olmaqla yanaşı, Millətlər Liqasında yeni rekorda da imza atdı.

38 yaş 42 günlük olarkən üç qol vuran Levandovski turnirin tarixində het-trik edən ən yaşlı futbolçu oldu. O, bu göstəricidə əvvəlki rekordun sahibi Kriştiano Ronaldonu geridə qoydu. Portuqaliyalı ulduz 2019-cu ildə 34 yaş 120 günlük olarkən Millətlər Liqasında het-trik etmişdi.

Levandovskinin Rumıniya ilə görüşdəki məhsuldarlığı bununla da yekunlaşmır. Hücumçu milli komanda karyerasında 7-ci het-trikinə imza atıb və bu göstərici ilə Avropanın ən məhsuldar futbolçuları sırasında yer alıb.

Polşalı forvard bu baxımdan Macarıstan futbolunun əfsanəsi Şandor Koçişə çatıb. Avropada isə yalnız dörd futbolçu yığmada Levandovskidən çox het-trikə imza atıb: Kriştiano Ronaldo – 10, Sven Ridel – 9, Gerd Müller və Poul Nilsen – 8.

Polşanın böyükhesablı qələbəsində Rumıniyanın erkən azlıqda qalması da rol oynayıb. Radu Draquşin cərimə meydançasında qayda pozuntusuna görə qırmızı vərəqə aldıqdan sonra qonaqlar 10 nəfərlə mübarizə aparmalı olub.

İki illik fasilədən sonra Polşa yığmasına qayıdan “Sabah”ın müdafiəçisi Timoteuş Puxaç isə qarşılaşmanı əvvəldən sona qədər ehtiyat oyunçular skamyasından izləyib.