https://www.innews.az/uploads/news/2026-09/_innews_b6017fa0560f62e31ce0da8ad_o.jpg
Azərbaycanda akkreditə olunmuş diplomatik korpusun nümayəndələrinin işğaldan azad edilmiş Qarabağ və Şərqi Zəngəzura növbəti səfəri regionda formalaşmış yeni reallıqların beynəlxalq aləm tərəfindən qəbul edildiyini bir daha dünyaya nümayiş etdirdi. Lakin bu səfərlə bağlı Ermənistan cəmiyyətinin və mediasının aqressiv reaksiyaları bu ölkənin xəstə və revanşist təfəkkürdən əl çəkmək istəmədiyini göstərir.
Qarabağ və Şərqi Zəngəzur iqtisadi rayonları Azərbaycanın beynəlxalq hüquqla tanınmış suveren əraziləridir. Ölkə hüdudları daxilində xarici diplomatların, beynəlxalq missiyaların və qonaqların hərəkət marşrutunu müəyyənləşdirmək, bu cür səfərlər təşkil etmək Bakının suveren hüququ və səlahiyyətidir. Ermənistan ictimaiyyətinin, hətta rəsmi şəxslərin beynəlxalq diplomatların Azərbaycan daxilindəki fəaliyyətinə qarışmağa cəhd göstərməsi rəsmi İrəvanın Azərbaycanın ərazi bütövlüyünü tanıması haqqında verdiyi bəyanatlarla kəskin ziddiyyət təşkil edir.
Diplomatik korpusun Qarabağ və Şərqi Zəngəzur bölgəsinə təşkil edilən səfərlərdə yüksək səviyyədə iştirakı təsdiqləyir ki, beynəlxalq ictimaiyyət Azərbaycanın suverenliyini və sərhəd toxunulmazlığını birmənalı şəkildə dəstəkləyir. Bu baxımdan Ermənistanın revanşist düşüncədən çıxış edərək bu prosesə kölgə salmağa çalışması Azərbaycanın daxili işlərinə kobud müdaxilə cəhdidir. Bu xüsusda, “Sülh Körpüsü”nün Azərbaycan üzrə qrupu da Ermənistan tərəfinin nümayiş etdirdiyi qeyri-konstruktiv, nifrətə söykənən mövqeyinə və revanşist yanaşmasına kəskin etirazını bildirib. Təşəbbüs qrupu bu cür addımların regionda etimadın qurulması prosesinə və sülh təşəbbüslərinə ağır zərbə vurduğunu bəyan edib.
Erməni cəmiyyətinin sərgilədiyi aqressiv reaksiya eyni zamanda illərdir davam edən şüurlu tarix saxtakarlığının və rasist düşüncə tərzinin təzahürüdür. Ermənistan Gəncəsər və Xudavəng kimi qədim alban dini-memarlıq abidələrini həyasızcasına öz irsi kimi qələmə verməyə və mənimsəməyə çalışdığı halda, öz ərazisində əsrlər boyu mövcud olmuş zəngin Azərbaycan tarixi-mədəni irsini tamamilə görməzdən gəlir və inkar edir. Azərbaycan torpaqlarında tarixən guya yalnız ermənilərin məskunlaşdığı nağılını uyduran, lakin müasir Ermənistan ərazisində azərbaycanlıların tarix boyu yaratdığı maddi-mədəni irsi, yaşayış məskənlərini yox sayan bu xəstə təfəkkür kökündən ksenofob xarakter daşıyır.
Bununla yanaşı, Azərbaycanın tarixi coğrafiyasında silinməz izlər qoymuş Qafqaz Albaniyası irsinə qarşı Ermənistandakı inkarçı reaksiya birbaşa ideoloji irqçilik nümunəsidir. Qafqaz Albaniyasının bu torpaqlardakı tarixi mövcudluğu, onun zəngin memarlığı beynəlxalq tədqiqatçılar tərəfindən təkzibedilməz faktlarla sübuta yetirilib. Ermənistan cəmiyyətinin bu tarixi həqiqətləri qəbul edə bilməməsi, elmi faktlara göz yumması isə onların saxtakarlığını göstərir. Birmənalı olaraq dərk edilməlidir ki, Azərbaycan Respublikasının hüdudları daxilində yerləşən bütün tarixi və dini mənşəli abidələr müstəsna olaraq Azərbaycan dövlətinə və onun xalqına məxsusdur. Bu irsin qorunması, bərpası və gələcək nəsillərə çatdırılması dövlətimiz tərəfindən tam məsuliyyətlə və beynəlxalq standartlara uyğun şəkildə təmin edilir.
Əslində, diplomatik korpusun Azərbaycanın suveren ərazilərinə səfərini, regionda sürətli bərpa-quruculuq işlərini hədəf almaq, xarici nümayəndələri media və sosial şəbəkələrdə hücumlara məruz qoymaq revanşist qüvvələrin nə qədər çarəsiz durumda olduğunu aydın göstərir. Ancaq bu cür əsassız narazılıqlar və təxribatçı etiraz aksiyaları təəssüf yaratmaqla paralel, İrəvanın beynəlxalq hüquq normalarına və sülh gündəliyinə nə dərəcədə hörmətsiz yanaşdığının da bariz sübutudur. Müşahidələr göstərir ki, Ermənistandakı revanşist meyillər sadəcə müxalif qruplarla məhdudlaşmır, hətta ehtimal edilir ki, mövcud siyasi rəhbərlik tərəfindən yönləndirilir. Diplomatik korpusun Qarabağ və Şərqi Zəngəzur səfərini hədəf alan yazıların, rəylərin məhz Ermənistan hakimiyyətinə yaxın media resursları və informasiya resursları tərəfindən tirajlanması bunu deməyə əsas verir.
Ermənistan parlamentinin sədri Ruben Rubinyanın mövzu ilə bağlı verdiyi məsuliyyətsiz açıqlamalar da rəsmi İrəvanın Azərbaycanın daxili işlərinə qarışmaq cəhdlərinin davam etdiyini göstərir. Eyni zamanda, sentyabrın 14-də Ermənistan parlamentində 2022-ci ilin 12-13 sentyabr tarixlərində sərhəddə baş vermiş hərbi toqquşmalarda məhv edilmiş erməni hərbçilərin anılması bəhanəsi ilə bir dəqiqəlik sükut elan olunması revanşist əhval-ruhiyyənin süni şəkildə qızışdırılmasına xidmət edir. Hər kəsə bəllidir ki, 2022-ci ilin sentyabrındakı sərhəd toqquşmaları məhz Ermənistan silahlı qüvvələrinin genişmiqyaslı hərbi təxribatlarının, şərti sərhədlərdə mühəndis-istehkam pozuntularının nəticəsi idi. Həmin vaxt Azərbaycan Ordusu təhlükəsizliyi təmin etmək üçün adekvat cavab tədbirləri görmək məcburiyyətində qalmışdı. Həmin təxribatçıları parlament səviyyəsində “qəhrəmanlaşdırmaq” cəhdi İrəvanın cəmiyyətdə yenidən nifrət, müharibə və intiqam hisslərini alovlandırmaq niyyətində olduğunu sübut edir.
Bütün bu təxribatçı addımlar silsiləsi rəsmi İrəvanın regionda davamlı sülhün bərqərar olunması, sərhədlərin delimitasiyası və kommunikasiyaların açılması prosesində nə dərəcədə qeyri-səmimi olduğunu göstərir. 44 günlük Vətən müharibəsindəki ağır hərbi-siyasi məğlubiyyətdən və 2023-cü ilin sentyabrında həyata keçirilən lokal antiterror tədbirlərindən sonra Paşinyan hakimiyyətinin faktiki olaraq sülh gündəliyini qəbul etməkdən başqa heç bir alternativi qalmayıb. Lakin sülh sazişi ətrafında manipulyasiyalar etmək, diplomatik səfərləri qarayaxma kampaniyasına çevirmək və nifrət nitqini körükləmək rəsmi İrəvanın sülh prosesini qəsdən ləngitməyə, beynəlxalq ictimaiyyəti çaşdırmağa hesablanmış məqsədyönlü siyasətidir.
Azərbaycanın ərazi bütövlüyünü bərpa etməklə yaratdığı yeni reallıqların dünya ictimaiyyəti tərəfindən qəbul edilməsi rəsmi Bakının qlobal miqyasda qazandığı böyük siyasi-diplomatik nailiyyətdir. Bu reallıq Ermənistanın revanşist xülyalarını puça çıxarmaqla bərabər, antiazərbaycançı şəbəkənin, ölkəmizə qarşı qarayaxma kampaniyası aparanların və antimilli ünsürlərin məğlubiyyəti deməkdir. O antimilli ünsürlər ki, ölkəmizə qarşı məkrli fəaliyyətləri ilə Ermənistandakı revanşistlərdən heç də geri qalmır, Avropada məskunlaşaraq sosial şəbəkələr üzərindən Azərbaycan dövlətinə dil uzadırdılar. Onların Azərbaycan hakimiyyətinə qarşı insan hüquqları, demokratiya və sair məsələlərlə bağlı iftiralar atmaqla dövlətimizin uğurlarına kölgə salmağa çalışdıqları, Ermənistanın və Qarabağdakı separatçıların maraqlarını müdafiə etdikləri gün kimi aydın idi. Ərazi bütövlüyümüzün bərpası, Qarabağda erməni separatizminə son qoyulması mənəviyyatsızlığın simvoluna çevrilmiş bu marginal qruplaşmanın da sonunu gətirdi.
Bütövlükdə, Azərbaycanın yaratdığı yeni reallıqlar regionda sülh və əməkdaşlıq üçün möhkəm zəmin formalaşdırmaqla yanaşı, heç bir qüvvənin bu reallıqları dəyişdirə bilməyəcəyini də aydın şəkildə göstərir. Ermənistan isə nə qədər tez xəstə və revanşist təfəkkürdən əl çəkib yeni reallıqları qəbul edərsə, Cənubi Qafqazda davamlı sülh və sabitliyin təmin olunmasına bir o qədər real töhfə verə bilər.
Xanlar Fətiyev,
Milli Məclisin deputatı
Ən son xəbərləri səhifəmizdən də izləyin
