https://www.innews.az/uploads/news/2026-09/_innews_b00bd27e9c81158f99b6b99bf_o.jpg
Zərgərlik və heykəltaraşlıq - miniatür incəliklə böyük formaların harmoniyasını tələb edən, metala və daşa ruh verən iki doğma sənət sahəsidir. 3 illik təcrübəyə malik zərgər-dizayner və heykəltaraş Rüfət İsrafil oğlu Mikayılov bu iki istiqaməti öz yaradıcılığında necə birləşdirdiyini, materialın dilini və gələcək hədəflərini "innews media"la bölüşüb.
Rüfət bəy, salam. Siz həm zərgər-dizayner, həm də heykəltaraş kimi fəaliyyət göstərirsiniz. Sənətdəki bu 3 illik təcrübəniz daxili aləminizdə nəyi dəyişdi?
- Salam. Bu 3 il mənə materialın dilini tapmağı öyrətdi. İstər kiçik bir zərgərlik nümunəsi olsun, istərsə də böyük bir heykəl , hər ikisi formaya ruh vermək tələb edir. Təcrübə artdıqca xırdalıqlara baxışım dəyişdi, səbrim və dəqiqliyim daha da itiləşdi.
- Heykəltaraşlıq və zərgərlik bir-birindən miqyasca çox fərqlənir. Bu iki sahə bir-birini necə tamamlayır?
- Heykəltaraşlıq mənə məkanı, həcmi və formanı daha geniş hiss etməyə kömək edir. Zərgərlik isə o böyük baxışı mikroskopik dəqiqliklə işləməyi tələb edir. Yəni, heykəl düzəldərkən zərgər incəliyini, zərgərlik məmulatı yaradarkən isə heykəltaraş möhtəşəmliyini tətbiq edirəm.
- İrəlidə sizi zərgərlik və heykəltaraşlığın sintezi olan daha böyük layihələrdə görə biləcəyikmi?
- Əlbəttə. Əsas məqsədim bu iki sənəti tam şəkildə birləşdirib özünəməxsus dəst-xətt yaratmaq və fərdiliyini qoruyan, heykəltaraşlıq elementləri daşıyan müəllif əsərləri təqdim etməkdir.
- Rüfət bəy, bu il zərgərlik sahəsində əsasən skulptural (heykəltaraşlıq üslublu) formalar, iri ölçülü gümüş detallar və təbii daşlar ön plana çıxır. Sizin də heykəltaraşlıq arxa planınız var. Bu ilin zərgərlik trendləri sizin yaradıcılıq xəttinizlə necə üst-üstə düşür?
- Tamamilə doğru vurğuladınız. Bu ilin ana trendi incəsənətlə zərgərliyin sərhədlərini itirən skulptural və memarlıq formalarıdır. Artıq sadə, kiçik bəzək əşyaları yerini “geyilə bilən incəsənət” (wearable art) konsepsiyasına verir.
Heykəltaraşlıq təcrübəm mənə metala birbaşa həcm və dinamika vermək imkanı yaradır. Xüsusən bu il trenddə olan iri qolbaqlar (cuff bracelets), mürəkkəb formalı üzüklər və mat/fakturalı metalların istifadəsi mənim dəsti-xəttimə tam uyğundur. İşlərimdə mikroskopik zərgər dəqiqliyi ilə heykəltaraşlıq həcmini birləşdirərək, trendləri sadəcə izləmir, onları öz üslubumda həyata keçirirəm.
Ən son xəbərləri səhifəmizdən də izləyin
