https://www.innews.az/uploads/news/2026-09/_innews_7bd552dcdfe0ff51941244282_o.jpg
ELÇİN TAĞIYEV YAZIR.....
Şəhid və Milli Qəhrəman ailələrinə dövlət qayğısının əsası Ulu Öndər Heydər Əliyev tərəfindən qoyulub. Bu siyasət bu gün Azərbaycan Respublikasının Prezidenti cənab İlham Əliyev və Birinci vitse-prezident hörmətli Mehriban Əliyeva tərəfindən uğurla davam etdirilir.
Məhz buna görə şəhid ailələrinin, Milli Qəhrəman ailələrinin və digər imtiyazlı vətəndaşlarımızın müraciətlərinə həssas yanaşılması hər bir dövlət qurumunun və vəzifəli şəxsin əsas vəzifələrindən biri olmalıdır.
Bu baxımdan Gəncə-Daşkəsən Regional Təhsil İdarəsinin rəisi Elçin Kərimovun və Goranboy-Naftalan rayonları üzrə təhsil sektorunun müdiri Vüsal Cəfərovun fəaliyyəti ilə bağlı bir sıra vətəndaş müraciətləri və narazılıqların ictimaiyyət tərəfindən səsləndirilməsi diqqət çəkir.
İctimaiyyət tərəfindən səsləndirilən və araşdırılmasına ehtiyac olduğunu düşündüyüm məsələlərdən bəziləri bunlardır:
1. Azərbaycanın Milli Qəhrəmanı Maşallah Abdullayevin yeganə övladı Gülxanım Abdullayeva ilə bağlı səsləndirilən narazılıqlar və onun qarşılaşdığı iddia edilən haqsızlıqlar.
2. 44 günlük Vətən müharibəsində şəhid olmuş Laçın Rasim oğlu Alıyevin anası Məlahət Cavadovanın müraciətlərinə münasibət məsələsi.
3. Dəliməmmədli şəhər sakini, Vətən müharibəsi şəhidi Ələs Rüstəmovun atası Vidadi Rüstəmovun işlə təmin olunması ilə bağlı müraciətinin aylarla nəticəsiz qalması barədə səsləndirilən iddialar.
4. I qrup əlil övladının anası olan Minarə müəllimənin üzləşdiyini bildirdiyi problemlər.
5. Bir sıra məktəb direktorlarının fəaliyyəti, eləcə də onların üzləşdiklərini bildirdikləri haqsızlıq və ədalətsizliklərlə bağlı məsələlər.
Bu kimi müraciət və narazılıqların sayı çoxdur və onların hər birinin obyektiv, qərəzsiz və hərtərəfli şəkildə araşdırılmasına ehtiyac var.
Əvvəlki rəhbərlik dövründə vətəndaşlarla münasibətdə müsbət nümunələrin olduğunu düşünən şəxslər sabiq idarə rəisi Anar Qədiməliyevin və sektor müdiri Xəyal Məmmədovun fəaliyyətini də bu baxımdan müsbət qiymətləndirirlər.
Ən əsas sual isə budur:
Goranboy-Naftalan rayonları üzrə təhsil sektorunun rəhbəri Vüsal Cəfərov xidmət etdiyi müddət ərzində şəhid ailələri ilə nə dərəcədə yaxından maraqlanıb, onların problemlərinin həllinə hansı formada dəstək göstərib?
Bu sualın cavablandırılması və səsləndirilən iddiaların aidiyyəti qurumlar tərəfindən obyektiv şəkildə araşdırılması vacibdir.
Hesab edirəm ki, Azərbaycan Respublikasının Elm və Təhsil Nazirliyi tərəfindən vətəndaşların, xüsusilə də şəhid ailələrinin müraciətlərinə münasibətlə bağlı səsləndirilən iddialara hüquqi və obyektiv qiymət verilməlidir.
Şəhid ailələrinin hüquq və mənafelərinin qorunması hər bir dövlət məmurunun xüsusi məsuliyyətidir. Bu müqəddəs ailələrin səsinə biganə qalınmamalı, onların müraciətləri formal vədlərlə deyil, real nəticələrlə cavablandırılmalıdır.
Goranboy rayonu Azərbaycan tarixində qəhrəmanlıq salnaməsi yazmış bölgələrdəndir. Bu torpağın şəhidlərinə və onların ailələrinə ehtiram göstərmək hər birimizin mənəvi borcudur.
Məsələnin araşdırılacağına və aidiyyəti qurumların müvafiq tədbir görəcəyinə ümid edirəm.
Ən son xəbərləri səhifəmizdən də izləyin
