İlk "100-lük"də 5 azərbaycanlı

Beynəlxalq Şahmat Federasiyası (FIDE) sentyabr ayı üçün yenilənmiş dünya reytinq cədvəlini açıqlayıb. Şahmatçılarmızdan ən yüksək göstərici yenə Şəhriyar Məmmədyarova məxsusdur. Təcrübəli qrossmeysterimiz 2720 xalla dünya reytinqinin 22-ci pilləsindəki mövqeyini dəyişməz saxlayıb.

Milli komandamızın digər təmsilçilərindən Teymur Rəcəbov 2689 xalla 38-ci sıradakı yerini qoruyub. Aydın Süleymanlı 2 mövqe geriləyərək 49-cu pilləyə düşdüyü halda (2664 xal), Məhəmməd Muradlı 34 pilləlik yüksək sıçrayışla 64-cü sıraya yüksəlib (2653 xal). Rauf Məmmədov isə 8 mövqe itirərək 91-ci pilləyə geriləyib (2639 xal). Kişilərin sıralamasında dünya reytinqinə 2823 xalla norveçli Maqnus Karlsen rəhbərlik etməkdə davam edir. ABŞ təmsilçiləri Hikaru Nakamura (2792 xal) ikinci, Fabiano Karuana (2789 xal) isə üçüncü sırada yer alıblar.

Qadın şahmatçılarımızın göstəricilərinə gəlincə, ölkə çempionu Ülviyyə Fətəliyeva (2402 xal) 18 pillə geriləyərək 43-cü sıraya enib. Gövhər Bəydullayeva (2392 xal) 53-cü pillədəki yerini qoruduğu halda, Xanım Balacayeva (2356 xal) 82-ci sırada qərarlaşıb. Günay Məmmədzadə isə 1 mövqe geriləyərək 90-cı pilləyə düşüb (2351 xal). Qadınların reytinq cədvəlinin ilk 3 pilləsində isə Çin təmsilçiləri qərarlaşıblar: Hou Yifan (2596 xal) birinci, Tszüy Vençzyun (2553 xal) ikinci, Ley Tintszye (2552 xal) isə üçüncü sıradadır.