Alvareslə bağlı müəmmaya Simeone cavab verdi

“Atletiko”nun baş məşqçisi Dieqo Simeone komandanın hücumçusu Xulian Alvaresin son günlər məşqlərdə iştirak etməməsi ilə bağlı yayılan xəbərlərə münasibət bildirib.

Argentinalı mütəxəssis mətbuat konfransında bütün diqqətlərin Alvaresin üzərində olmasını başa düşdüyünü, ancaq hazırda “Sevilya” ilə qarşılaşmaya kökləndiyini deyib:

“Başa düşürəm ki, bütün suallar Xulianla bağlı olacaq. Amma mən hazırda “Sevilya”nı düşünürəm. O, bu oyunda iştirak edə bilməyəcək”.

Daha əvvəl Alvaresin xəstəliyi səbəbindən üç gündür “Atletiko” ilə məşq etmədiyi barədə məlumat yayılmışdı. Argentinalı futbolçunun adı son günlər transfer xəbərlərinin də əsas mövzularından biridir. “Atletiko” rəhbərliyi isə “Barselona”nın Alvaresi transfer etmək istəyini qəti şəkildə rədd edib.

“Sevilya” – “Atletiko” qarşılaşması La Liqanın 3-cü turu çərçivəsində avqustun 29-da keçiriləcək. Matç saat 23:30-da start götürəcək.