https://www.innews.az/uploads/news/2026-09/_innews_9c9e12f6862c84ee7a0bdab53_o.jpg
Lənkəran Dövlət Dram Teatrında 1 sentyabr 2026-cı il tarixində yeni 136-cı teatr mövsümünə həsr olunmuş yığıncaq keçirilib.
Yığıncağda teatrın qarşısında duran əsas vəzifələr, yeni mövsümdə həyata keçirilməsi nəzərdə tutulan yaradıcılıq layihələri, kollektivin qarşıdakı fəaliyyət istiqamətləri və teatr sənətinin inkişafına töhfə verəcək yeni təşəbbüslər ətrafında geniş fikir mübadiləsi aparılıb.
Tədbirdə çıxış edən teatrın direktoru, Azərbaycan Respublikasının Əməkdar Mədəniyyət işçisi, Dağıstan Respublikasının Əməkdar artisti Laləzar xanım Hüseynova kollektivi yeni teatr mövsümünün başlanması münasibətilə təbrik edib. O, ötən mövsüm ərzində teatr kollektivinin gördüyü işlərə və əldə etdiyi nailiyyətlərə diqqət çəkərək, yaradıcı heyətin fəaliyyətini yüksək qiymətləndirib.
Laləzar xanım Hüseynova bildirib ki, yeni mövsüm teatr kollektivi qarşısında daha böyük yaradıcılıq məqsədləri və məsuliyyətli vəzifələr qoyur. Qarşıdakı dövrdə repertuarın zənginləşdirilməsi, tamaşaların bədii və peşəkar səviyyəsinin daha da yüksəldilməsi, yaradıcı heyətin potensialından səmərəli istifadə olunması və tamaşaçı auditoriyasının genişləndirilməsi istiqamətində bir sıra mühüm işlərin həyata keçirilməsi nəzərdə tutulur. Yaradıcı heyətə yeni mövsümdə uğurlar, yaradıcılıq axtarışlarında yeni nailiyyətlər və məhsuldar fəaliyyət arzulayıb.
Tədbir zamanı Lənkəran Dövlət Dram Teatrının 135-ci teatr mövsümündə həyata keçirdiyi fəaliyyətə və əldə etdiyi nailiyyətlərə qısa nəzər salınıb. Ötən mövsüm ərzində nümayiş etdirilən tamaşalar, keçirilən mədəni-kütləvi tədbirlər, müxtəlif əlamətdar və tarixi günlərlə bağlı hazırlanan səhnə proqramları, eləcə də kollektivin yaradıcılıq fəaliyyəti diqqətə çatdırılıb.
Daha sonra teatrın şöbə müdirləri çıxış edərək yeni mövsümdə görülməsi nəzərdə tutulan işlər, qarşıya qoyulan məqsədlər və fəaliyyət planları barədə məlumat veriblər. Çıxışlarda teatrın yaradıcılıq potensialının daha da inkişaf etdirilməsi, kollektiv daxilində əməkdaşlığın gücləndirilməsi, tamaşaların yüksək peşəkarlıq səviyyəsində hazırlanması və teatrın uğurlarının daha da artırılması istiqamətində görüləcək işlərdən bəhs olunub.
Tədbirdə vurğulanıb ki, yeni teatr mövsümü yaradıcılıq baxımından mühüm yeniliklərlə yadda qalmalıdır. Kollektivin hər bir üzvünün üzərinə düşən vəzifəyə məsuliyyətlə yanaşması, yaradıcı təşəbbüslərin dəstəklənməsi və peşəkar fəaliyyətin davam etdirilməsi qarşıdakı dövrün əsas prioritetlərindəndir.
Qeyd edək ki, Lənkəran Dövlət Dram Teatrı 136-cı teatr mövsümünü yazıçı-dramaturq Hüseynbala Mirələmovun “Gəlinlik paltarı” tamaşası ilə açmağı planlaşdırır.
Ən son xəbərləri səhifəmizdən də izləyin
