https://www.innews.az/uploads/news/2026-08/_innews_c8b3a39b80511dc06b7ade04f_o.jpg
26 avqust – Laçın Şəhəri Günü ərəfəsində rayonda silsilə mədəni tədbirlərə start verilib. Bu tədbirlər çərçivəsində 24–27 avqust tarixlərində Laçın Beynəlxalq Film Festivalı – Laçın International Film Festival (LIFF) keçirilir.
Laçın rayonunda Bərpa, Tikinti və İdarəetmə Xidmətindən verilən məlumata görə, “LIFF – Where Film Meets LIFE” şüarı ilə keçirilən festival Qarabağ və Şərqi Zəngəzurun ilk beynəlxalq film festivalıdır. LIFF dünya kinosunu Laçına gətirməklə yanaşı, şəhəri beynəlxalq kino ictimaiyyətinə təqdim edən yeni mədəni platforma kimi fəaliyyət göstərir.
Festivalın əsas məqsədi Azərbaycan kinosunun beynəlxalq kino prosesi ilə əlaqələrini genişləndirmək, müxtəlif ölkələrdən kino peşəkarlarını bir araya gətirmək, yeni yaradıcı əməkdaşlıqlar üçün imkan yaratmaq və Laçının beynəlxalq kino və yaradıcı sənaye məkanı kimi potensialını nümayiş etdirməkdir.
Festival üçün 47 ölkədən 300-ə yaxın film təqdim olunub. Beynəlxalq seçim prosesindən sonra 20 xarici və 18 Azərbaycan filmi olmaqla 38 film əsas rəsmi seçim proqramına daxil edilib. Filmlər festivalın əsas mükafatı olan “Qızıl Palıd Budağı” uğrunda mübarizə aparır.
Festivalda Türkiyə, Özbəkistan, İran, Rusiya, Qırğızıstan, Yunanıstan, Norveç, Fransa, Ukrayna, Pakistan və digər ölkələrdən kino nümayəndələri iştirak edir. Ümumilikdə 15 xarici qonağın festival proqramına qatılması nəzərdə tutulur.
Festivalın əsas yarışma proqramını müxtəlif ölkələri təmsil edən kino peşəkarlarından ibarət münsiflər heyəti qiymətləndirir. Heyətdə Türkiyədən Suat Köçer (sədr) və Alper Akdeniz, İrandan Reza Siami, Özbəkistandan Eldar Yoldaşov, Azərbaycandan Gülzar Qurbanova, Elçin Musaoğlu, Müşfiq Hətəmov (sədr), Sevda Sultanova, Cəmil Quliyev, Məzahir Həşimov və Fehruz Şamıyev yer alır.
Festivalın əsas film nümayişləri 24–26 avqust tarixlərində “LaCinema”da keçirilir. Proqramda Azərbaycanla yanaşı, Almaniya, Polşa, Özbəkistan, İspaniya, Türkiyə, İndoneziya, Moldova, Yunanıstan, Serbiya, Ukrayna, Hindistan və digər ölkələrdən filmlər təqdim olunur.
Laçın Beynəlxalq Film Festivalının əsas tərəfdaşları sırasında Laçın rayonunda Azərbaycan Respublikası Prezidentinin xüsusi nümayəndəliyi, Azərbaycan Respublikası Mədəniyyət Nazirliyi, Qarabağ Dirçəliş Fondu, Azərbaycan Respublikası Kino Agentliyi, Laçın rayonunda Bərpa, Tikinti və İdarəetmə Xidməti, Bakı Abadlıq Xidmətinvə “Laçın Abadlıq Xidməti” yer alır.
Festivalın təşkilinə və həyata keçirilməsinə “LaCinema”, “KYNO” platforması, “Gilabi Ceramics”, “Nakhışlı”, “İstisu”, “Abdallar” Hotel və “Latifa” Tikiş Fabriki sponsor dəstəyi göstərir.
Festivalın təsisçisi və icraçı-yaradıcı tərəfdaşı “HochazFilm Creative Studio”, festival direktoru isə studiyanın həmtəsisçisi və direktoru Amil Amaldır.
Festivalın əsas mükafatı “Qızıl Palıd Budağı”dır. Bağlanış və mükafatlandırma mərasiminin 26 avqust – Laçın Şəhəri Günü çərçivəsində keçirilməsi nəzərdə tutulur.
Ən son xəbərləri səhifəmizdən də izləyin
