https://www.innews.az/uploads/news/2026-08/_innews_bfaa21962e6571c65dcf52c13_o.jpg
Azərbaycan Jurnalistlər Birliyinin (AJB) Aran bölgəsində fəaliyyət göstərən jurnalistlərlə zona müşavirəsi keçirilib.
Tədbir 1 avqust 2026-cı il tarixində Mingəçevir Gənclər Evində, EL TV-nin təşkilatçılığı ilə baş tutub. Müşavirədə Azərbaycan Jurnalistlər Birliyinin sədri, Əməkdar jurnalist Elçin Şıxlı, AJB-nin İşçi Qrupunun üzvləri, bölgədə fəaliyyət göstərən jurnalistlər, media rəhbərləri, televiziya, xəbər saytları və sosial media platformalarının nümayəndələri iştirak ediblər.
Tədbirə Aran bölgəsindən 30-dan çox jurnalist qatılıb.
Müşavirədə AJB-nin sədri, Əməkdar jurnalist Elçin Şıxlı, AJB-nin İşçi Qrupunun üzvləri – “Qafqaz” TV-nin direktoru Eltən Törəçi, EL TV-nin direktoru İqbal Məmmədəliyev, “Ədəbiyyat və İncəsənət” portalının qurucu-baş redaktoru, Əməkdar jurnalist Varis Yolçuyev, Beynəlxalq “ALAŞ” Ədəbiyyat Mükafatı laureatı Əkbər Qoşalı, Əməkdar jurnalist Fərman Nəbiyev, “Söz Odası” dərgisinin baş redaktoru Elşən Əzim, “Kanal32” media qurumunun qurucu-baş redaktoru İnqilab Şirinli, “Mingəçevir” qəzetinin əməkdaşı Mətanət Məmmədova, “Azərbaycan müəllimi” qəzetinin bölgə nümayəndəsi Aynur Araz, Dialoq.az saytının baş redaktoru Natiq Əlisoy və digər iştirakçılar çıxış edərək müzakirə olunan məsələlərlə bağlı fikir və təkliflərini bölüşüblər.
Müşavirədə AJB-nin yenilənmə prosesi, bölgə mediasının mövcud vəziyyəti, jurnalistlərin peşə fəaliyyəti ilə bağlı ehtiyacları və gələcək əməkdaşlıq imkanları geniş müzakirə olunub. Çıxış edənlər bölgə mediasının üzləşdiyi problemlərdən bəhs edib, AJB-nin gələcək fəaliyyəti ilə bağlı təkliflərini səsləndiriblər.
Tədbirdə çağdaş jurnalistikanın qarşısında duran yeni çağırışlar da diqqət mərkəzində olub. Süni intellektdən istifadənin imkanları, sosial media mühiti, vətəndaş jurnalistikası, dezinformasiya ilə mübarizə, reklam bazarının vəziyyəti, oxucu etimadının qorunması, peşə etikası və jurnalistlərin hüquqlarının müdafiəsi əsas müzakirə mövzularından olub.
Görüşdə dövlətin informasiya təhlükəsizliyinin qorunmasının əhəmiyyəti xüsusi vurğulanıb. Qeyd olunub ki, müasir dövrdə informasiya təhlükəsizliyi təkcə texniki məsələ deyil, eyni zamanda cəmiyyətin etibarlı informasiya ilə təmin edilməsi, milli maraqların qorunması və peşəkar medianın gücləndirilməsi ilə sıx bağlıdır.
Bildirilib ki, son illərdə qlobal media şirkətləri və sosial platformalar yerli informasiya məkanına ciddi təsir göstərir. Bu platformalar yeni imkanlar yaratmaqla yanaşı, yalan xəbərlərin, manipulyativ məzmunun, səthi informasiyanın və qeyri-peşəkar yayımçılığın sürətlə yayılmasına da şərait yaradır. Belə bir şəraitdə peşəkar jurnalistikanın rolu daha da artır.
Müşavirədə bölgə jurnalistlərinin yeni bilik və bacarıqlara yiyələnməsinin vacibliyi də diqqətə çatdırılıb. Süni intellekt alətlərindən səmərəli istifadə, video çəkilişi və montaj, sosial media idarəçiliyi, şəxsi brendin formalaşdırılması, data analizi, faktların yoxlanılması (fact-checking) və kibertəhlükəsizlik sahəsində biliklərin müasir jurnalistin əsas peşə kompetensiyaları olduğu qeyd edilib.
Çıxışlarda jurnalistlər arasında peşə həmrəyliyinin möhkəmləndirilməsi, bilik və təcrübə mübadiləsinin genişləndirilməsi, bölgə mediasının daha fəal tanıdılması, eləcə də AJB ilə yerli jurnalistlər arasında davamlı əməkdaşlıq mexanizminin yaradılması təklif olunub.
Vurğulanıb ki, Azərbaycan Jurnalistlər Birliyi bölgə jurnalistlərinin peşəkar inkişafına dəstək göstərmək, onların təlimlərə cəlb olunmasını təmin etmək, yeni bilik və bacarıqların paylaşılmasına şərait yaratmaq, həmçinin Aran bölgəsi mediasının ölkənin ümumi media məkanında daha geniş təmsil olunmasına dəstək vermək istiqamətində fəaliyyətini davam etdirəcək.
Görüş açıq müzakirə şəraitində keçib. Səsləndirilən təklif və təşəbbüslərin AJB-nin gələcək fəaliyyət proqramında nəzərə alınacağı bildirilib.
Tədbirin sonunda Azərbaycan Jurnalistlər Birliyi ilə bölgə mediası arasında daha sıx, səmərəli və davamlı əməkdaşlıq əlaqələrinin qurulmasının vacibliyi bir daha vurğulanıb.
Ən son xəbərləri səhifəmizdən də izləyin
