https://www.innews.az/uploads/news/2026-07/_innews_1f37155ed2d5ee835896273a5_o.jpg
Dünən, 30 iyul 2026-cı il tarixdə Masallı Rayon İcra Hakimiyyətinin başçısı Araz Əhmədov rayonun ucqar dağ kəndlərindən olan Köhnə Zuvand kəndinə növbəti səfər edib.
Səfər çərçivəsində rayon rəhbəri “Aztelekom” İB tərəfindən kəndə çəkilmiş yeni genişzolaqlı internet xəttinin istifadəyə verilməsi münasibətilə kənd sakinləri ilə görüşüb, onları bu əlamətdar hadisə münasibətilə təbrik edib. Bildirilib ki, kəndlərin müasir telekommunikasiya infrastrukturu ilə təmin olunması əhalinin informasiya resurslarına çıxış imkanlarının genişlənməsinə, təhsil, səhiyyə və digər elektron xidmətlərdən daha səmərəli istifadəyə mühüm töhfə verir.
Görüş zamanı Araz Əhmədov kənd sakinlərinin müraciətlərini dinləyib, onların qaldırdıqları məsələlərlə yaxından maraqlanıb. Rayon rəhbəri qeyd edib ki, əvvəlki görüş zamanı sakinlər tərəfindən səsləndirilən müraciətlərin mərhələli şəkildə həllinə başlanılıb. Bu istiqamətdə həyata keçirilən tədbirlərin bariz nümunəsi kimi kəndə gedən avtomobil yolunda cari təmir işlərinin aparılması və Köhnə Zuvand kəndinin yüksəksürətli internet şəbəkəsinə qoşulması göstərilib.
Səfər zamanı rayon rəhbəri kəndin zəngin fauna və florası ilə də tanış olub, təbii sərvətlərin qorunmasının və ekoloji tarazlığın saxlanılmasının vacibliyini vurğulayıb.
Kənd sakinləri göstərilən diqqət və qayğıya görə ölkə Prezidenti cənab İlham Əliyevə minnətdarlıqlarını ifadə edib, rayon rəhbərinin mütəmadi olaraq kəndə səfər etməsini və qaldırılan məsələlərin həlli istiqamətində görülən işləri yüksək qiymətləndiriblər.
İsrafil ŞÜKÜROV,
Leqal.az saytını Baş redaktor
Ən son xəbərləri səhifəmizdən də izləyin
