https://www.innews.az/uploads/news/2026-07/_innews_83b1bffeacbc49c6ecd3772e2_o.jpg
Azərbaycan Respublikası Mədəniyyət Nazirliyinin və Azərbaycan Respublikasının Özbəkistan Respublikasındakı Səfirliyinin tabeliyində Heydər Əliyev adına Azərbaycan Mədəniyyət Mərkəzinin təşəbbüsü ilə həyata keçirilən “Azərbaycan Mədəniyyətinin Yay Məktəbi” layihəsi çərçivəsində iştirakçıların Qarabağ bölgəsinə səfəri təşkil olunub.
Ağdam, Füzuli və Şuşa şəhərlərini əhatə edən səfər zamanı layihə iştirakçıları Qarabağın zəngin tarixi-mədəni irsi, işğal dövründə dağıntılara məruz qalmış dini və memarlıq abidələri, eləcə də azad edilmiş ərazilərdə həyata keçirilən genişmiqyaslı bərpa-quruculuq və abadlıq işləri ilə yaxından tanış olublar.
Səfərin ilk dayanacağı Ağdam şəhəri olub. İştirakçılar burada Qarabağın qədim islam nekropollarından biri hesab edilən Qaraağacı qəbiristanlığını və Ağdam Cümə məscidini ziyarət ediblər. Ziyarət zamanı iştirakçılara abidələrin tarixi, işğal illərində məruz qaldığı dağıntılar, həmçinin onların qorunması və gələcək nəsillərə çatdırılması məqsədilə hazırda aparılan bərpa və mühafizə işləri barədə ətraflı məlumat verilib.
Daha sonra iştirakçılar Füzuli şəhərinə yollanıblar. Burada onlar Özbəkistan Prezidenti Şavkat Mirziyoyevin təşəbbüsü ilə inşa edilərək Azərbaycan xalqına hədiyyə olunmuş Mirzə Uluqbəy adına 1 nömrəli tam orta məktəblə tanış olublar. Tanışlıq zamanı iştirakçılara məktəbin yaradılması və fəaliyyəti, Füzuli şəhərində müasir təhsil infrastrukturunun qurulması, yeni yaşayış mühitinin formalaşdırılması, eləcə də sakinlərin doğma torpaqlarına qayıdışının təmin olunması istiqamətində həyata keçirilən tədbirlər barədə dolğun məlumat verilib.
Proqram çərçivəsində iştirakçılar Azərbaycanın mədəniyyət paytaxtı Şuşa şəhərinə də səfər ediblər. Onlar Şuşa qalasını, böyük Azərbaycan şairi Molla Pənah Vaqifin məqbərəsini, İsa bulağını, Cıdır düzünü, Yuxarı və Aşağı Gövhər Ağa məscidlərini, Mehmandarovların malikanə kompleksini və Güllələnmiş heykəlləri ziyarət edərək bu tarixi-mədəni irs nümunələrinin əhəmiyyəti, Şuşanın Azərbaycan ədəbiyyatı, musiqisi və memarlığındakı yeri, eləcə də şəhərdə həyata keçirilən bərpa və abadlıq işləri barədə müfəssəl məlumat alıblar.
Qeyd edək ki, bu səfər iştirakçılara Qarabağın zəngin tarixi-mədəni irsini yerində öyrənmək, işğal dövründə abidələrə vurulmuş ziyanın miqyasını müşahidə etmək və azad edilmiş ərazilərdə aparılan genişmiqyaslı bərpa-quruculuq işləri ilə yaxından tanış olmaq imkanı yaratmaqla yanaşı, Qarabağla bağlı tarixi həqiqətlərin dünya ictimaiyyətinə obyektiv şəkildə çatdırılmasına da mühüm töhfə verəcəkdir.
Ən son xəbərləri səhifəmizdən də izləyin
