https://www.innews.az/uploads/news/2026-07/_innews_514ab641013c965ae255356bc_o.jpg
Qadın və qızların dəstəklənməsinə sadiqliyinin bir hissəsi olaraq, Böyük Britaniyanın Bakıdakı Səfirliyi Azərbaycan Memarlıq və İnşaat Universiteti, Azərbaycan Dövlət Rəssamlıq Akademiyası və Böyük Britaniyanın aparıcı memarlıq şirkətləri olan Zaha Hadid Architects, Chapman Taylor və Scott Brownrigg ilə əməkdaşlıq çərçivəsində qız tələbələr üçün "Memarlıqda Qadınlar" müsabiqəsini həyata keçirib. Müsabiqənin birinci mərhələsi 2025-ci ilin dekabr ayında yekunlaşıb və dörd qalib Zaha Hadid Architects tərəfindən layihələndirilmiş, Bakının simvollarından biri olan Heydər Əliyev Mərkəzində keçirilən tədbirdə Lord Con Alderdis tərəfindən elan olunub.
Bu uğurun davamı olaraq, proqramın ikinci mərhələsi çərçivəsində Səfirlik Britaniya Memarlar Kral İnstitutu (RIBA) ilə əməkdaşlıq edərək dörd qalib üçün Londona tədris səfəri təşkil edib. Səfər zamanı tələbələr müsabiqə işlərinin qiymətləndirilməsi və qaliblərin seçilməsi prosesində iştirak etmiş Zaha Hadid Architects, Chapman Taylor və Scott Brownrigg daxil olmaqla, Böyük Britaniyanın aparıcı memarlıq şirkətləri ilə görüşüblər.
Proqram iştirakçılara beynəlxalq səviyyədə tanınmış memarlıq şirkətlərinin fəaliyyəti ilə yaxından tanış olmaq, həmçinin sahənin aparıcı mütəxəssisləri tərəfindən keçirilən seminar və peşəkar inkişaf sessiyalarında iştirak etmək üçün nadir imkan yaradıb.
Təşəbbüs Londonda Zaha Hadid Architects şirkətinin mənzil qərargahında keçirilən qala tədbiri ilə yekunlaşıb və bu tədbirdə "Hər Damlada Ümid: Dəyişiklik üçün İncəsənət və Memarlıq" müsabiqəsinin başa çatması qeyd olunub. Layihə gənc memar və rəssamları dünyanın ən aktual problemlərindən biri olan su qıtlığına innovativ yanaşmalar irəli sürməyə, eləcə də dizayn və yaradıcılıq vasitəsilə dayanıqlı şəhər həllərini təşviq etməyə həvəsləndirib.
Ən son xəbərləri səhifəmizdən də izləyin
