AmCham İnsan Resursları və Əmək Komitəsində ƏMAS və “DOST Müfəttiş” layihəsi üzrə son yeniliklər müzakirə olunub

18 iyun 2026-cı il tarixində AmCham Azərbaycanın İnsan Resursları və Əmək Komitəsi tərəfindən “Əmək və Məşğulluq” altsistemi (ƏMAS) üzrə yeniliklər və “DOST Müfəttiş” layihəsinə həsr olunmuş görüş təşkil olunub.

Tədbirdə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin, Nazirliyin tabeliyində Əmək Bazarı və Sosial Müdafiə Məsələləri üzrə Milli Observatoriyanın nümayəndələri, AmCham Azərbaycana üzv şirkətlərin təmsilçiləri və özəl sektor nümayəndələri daxil olmaqla 180-ə yaxın iştirakçı iştirak edib.

Görüş AmCham Azərbaycanın İnsan Resursları və Əmək Komitəsinin sədri Pərviz Tahirovun moderatorluğu ilə keçirilib. O, əmək münasibətlərinin təkmilləşdirilməsi və rəqəmsallaşdırılması istiqamətində dövlət və özəl sektor arasında əməkdaşlığın əhəmiyyətini vurğulayıb.

Tədbirdə çıxış edən Dövlət Əmək Müfəttişliyi Xidmətinin rəis müavini Nərmin Mirzəyeva əmək münasibətlərinin rəqəmsallaşdırılması sahəsində görülən işlər barədə məlumat verərək bildirib ki, hazırda əmək müqavilələrinin 97 faizi elektron qaydada bağlanır. O, həmçinin əmək qanunvericiliyinə edilmiş son dəyişikliklər, “DOST Müfəttiş” və “Nümunəvi müəssisə” layihələri, eləcə də əməyin mühafizəsi istiqamətində həyata keçirilən tədbirlər barədə məlumat verib.

Görüş çərçivəsində “DOST Müfəttiş” layihəsinə xüsusi diqqət ayrılıb. Qeyd olunub ki, layihə müəssisələrdə əmək qanunvericiliyinə əməl olunması, əməyin mühafizəsi, insan resurslarının idarə olunması və ƏMAS-ın tətbiqi üzrə qiymətləndirmələrin aparılmasını nəzərdə tutur. Bu günədək 30 müəssisədə qiymətləndirmələr həyata keçirilib, 500-dən çox uyğunsuzluq aşkarlanaraq onların aradan qaldırılması istiqamətində tədbirlər görülüb.

Dövlət Əmək Müfəttişliyi Xidmətinin Əmək münasibətlərinin rəqəmsallaşdırılması şöbəsinin müdir müavini Aynurə Tağıyeva ƏMAS-da tətbiq olunan yeniliklər və AmCham Azərbaycanın İnsan Resursları və Əmək Komitəsi tərəfindən təqdim edilmiş təkliflər barədə təqdimatla çıxış edib. Təqdimatda elektron kadr kargüzarlığı, sistemin inteqrasiya imkanları və hesabatlılıq mexanizmləri haqqında ətraflı məlumat verilib.

Əmək Bazarı və Sosial Müdafiə Məsələləri üzrə Milli Observatoriyanın Təlimlərin təşkili və layihələrlə iş departamentinin müdiri Əli Mahmudov isə “DOST Müfəttiş” layihəsinin məqsədləri, tətbiq mexanizmləri və əldə olunan nəticələr barədə iştirakçılara məlumat təqdim edib.

Tədbir Dövlət Əmək Müfəttişliyi Xidmətinin Əməyin mühafizəsinə nəzarət şöbəsinin müdiri Günel Baxşıyeva və Əmək qanunvericiliyinə riayət olunmasına dövlət nəzarət şöbəsinin müdir müavini Mehman Abdullayevin iştirakı ilə keçirilən sual-cavab sessiyası ilə yekunlaşıb. Sessiya zamanı iştirakçıların ƏMAS-ın tətbiqi, əmək qanunvericiliyinin icrası və sistemin təkmilləşdirilməsi ilə bağlı sualları cavablandırılıb.

AmCham Azərbaycan Dövlət Əmək Müfəttişliyi Xidmətinin və Əmək Bazarı və Sosial Müdafiə Məsələləri üzrə Milli Observatoriyanın nümayəndələrinə görüşə verdikləri dəyərli töhfəyə görə təşəkkürünü bildirir. Təqdim olunan məlumatlar iştirakçılara əmək qanunvericiliyindəki yeniliklər, rəqəmsallaşdırma təşəbbüsləri və işəgötürənlər üçün yaradılan yeni imkanlar barədə faydalı məlumatlar əldə etmək imkanı yaradıb.