https://www.innews.az/uploads/news/2026-06/_innews_e38828e961024e30d1a483fd2_o.jpg
Azərbaycanın Xalq artisti Yusif Eyvazov Arena di Verona-da yeni mövsümün açılışı, əfsanəvi opera səhnəsinin özünəməxsus atmosferi, Verdinin “Traviata” operasındakı Alfredo partiyası və cari yay mövsümündə iştirak etdiyi tamaşalar barədə fikirlərini bölüşüb.
Arena di Verona-da çıxışlar artıq uzun illərdir ki, Yusif Eyvazovun yaradıcılıq fəaliyyətinin ayrılmaz hissəsinə çevrilib. Tenor on iki ildən artıqdır ki, hər yay mövsümündə bu məşhur səhnəyə qayıdır. Arena di Verona açıq səma altında yerləşən qədim Roma amfiteatrıdır və dünyanın ən nüfuzlu opera məkanlarından biri hesab olunur.
Yeni mövsümün açılışından danışan sənətçi bildirib:
“Bu məkan mənim üçün artıq tanış iş yeridir, amma eyni zamanda çox özəldir. Mən hesab edirəm ki, dünyada belə enerjiyə malik ikinci bir yer yoxdur. Tamaşa zamanı hava qaraldıqca qədim amfiteatrın üzərində ulduzlar görünür. Maraqlıdır ki, qaranlıq düşdükdən sonra akustika da sanki dəyişir, səs daha rahat yayılır və insan özünü tam fərqli hiss edir. Bu, izahı çətin olan, amma hər dəfə hiss etdiyim çox maraqlı bir məqamdır”, - deyə Yusif Eyvazov bildirib.
Sənətçinin repertuarında xüsusi yer tutan rollardan biri də Cüzeppe Verdinin “Traviata” operasındakı Alfredo partiyasıdır. Məhz bu partiya ilə o, Arena di Verona-nın yeni mövsümünün açılışında çıxış edib.
“Alfredo partiyası repertuarımda xüsusi yer tutur. Adətən bu rolu daha çox gənc tenorlar ifa edirlər. Mən onu çox tez-tez oxumamışam, amma yenidən bu obraza qayıtmaq istədim. Bu mənim üçün çox maraqlı təcrübə oldu”, - deyə tenor qeyd edib.
“Traviata” tamaşasının quruluşçu rejissoru dünyanın aparıcı opera teatrları ilə əməkdaşlıq etmiş məşhur britaniyalı rejissor Pol Karrandır. Tamaşanın musiqi rəhbəri isə Avropanın yeni nəsil dirijorları arasında ən parlaq simalardan biri hesab olunan gənc italiyalı maestro Miçele Spotti olub.
Cari mövsümdə Yusif Eyvazov Arena di Verona səhnəsində “Bohema”, “Turandot” və “Aida” operalarında da çıxış edəcək. Söhbət opera sənətinin canlı əfsanəsinə çevrilmiş Franko Zeffirellinin klassik quruluşundan, həmçinin Avropanın ən tələb olunan teatr rejissorlarından və rəssamlarından biri olan Stefano Podanın müasir səhnə həllindən gedir.
“Zeffirelli artıq opera teatrının tarixidir. Bu, həmişə yaşayacaq klassikadır”, - deyə sənətçi vurğulayıb.
Yusif Eyvazov Arena di Verona-nın onun həyatında xüsusi yer tutduğunu da qeyd edib.
“Mənim üçün Arena di Verona ikinci evə çevrilib. Hər il böyük məmnuniyyətlə buraya qayıdıram. Bu səhnədə çıxış etmək həm böyük şərəf, həm də böyük məsuliyyətdir”, - deyə Xalq artisti bildirib.
Mövsümün açılışından sonra sənətçi Arena di Verona rəhbərliyinə, səhnə tərəfdaşlarına və dirijor Miçele Spottiyə təşəkkürünü ifadə edib.
“Arena di Verona-ya bu möhtəşəm axşama görə təşəkkür edirəm. Səhnədəki həmkarlarıma və maestro Miçele Spottiyə xüsusi minnətdarlığımı bildirirəm. Bu yay çox maraqlı olacaq!” - deyə Yusif Eyvazov Instagram səhifəsində yazıb.
Ən son xəbərləri səhifəmizdən də izləyin
