https://www.innews.az/uploads/news/2026-06/_innews_3c0d9c9a1d9330fdcc65712ea_o.jpg
Yüksəkvəzifəli siyasətçilər, qlobal maliyyə sektorunun liderləri, kapital bazarı mütəxəssisləri, inkişaf institutları və sukuk bazarının iştirakçıları Azərbaycanın Bakı şəhərində keçirilən “Etiketli Sukuk - Növbəti Mərhələ” mövzusunda foruma qatılıblar.
Bu yüksəksəviyyəli tədbir Bakıda “Dayanıqlı rifah naminə regional inteqrasiya” devizi altında keçirilən 2026-cı il İslam İnkişaf Bankı (İİB) Qrupunun İllik Toplantılarının üçüncü günündə təşkil olunub.
İştirakçılar etiketli sukukun dayanıqlı inkişaf prioritetlərini necə dəstəkləyə biləcəyini, eyni zamanda qlobal kapital bazarları vasitəsilə İslam maliyyəsinin əhatə dairəsini necə genişləndirə biləcəyini müzakirə ediblər.
2025-ci ildə etiketli sukuk bazarı 20 milyard ABŞ dollarını ötərək illik müqayisədə 38 faizlik artım nümayiş etdirib ("S&P"nin məlumatına əsasən). Bu göstərici ötən il buraxılmış bütün sukukların 10%-dən azını təşkil etsə də, İslam maliyyəsinin prinsipləri ilə müsbət təsir və dayanıqlılığa yönəlmiş müxtəlif hədəflər arasındakı təbii uyğunluq etiketli sukuk bazarının əvvəlkindən daha sürətlə böyüyəcəyinin əlamətidir.
Tədbirdə qlobal iqlim çağırışlarını və Dayanıqlı İnkişaf Məqsədlərinə nail olmaqla bağlı yaranan irimiqyaslı maliyyə tələbatlarını qarşılamaq üçün innovativ maliyyələşdirmə həllərinə artan ehtiyaca xüsusi diqqət yetirilib.
Tədbiri giriş sözü ilə açan İİB-nin Maliyyə üzrə vitse-prezidenti və Baş maliyyə direktoru vəzifəsini icra edən Dr. Abdurabbih Abduss vurğulayıb ki, sukuk inkişaf resurslarının səfərbər edilməsi üçün əsas İslami kapital bazarı aləti olaraq qalır, eyni zamanda etiketli sukuklar investorlar üçün İslam maliyyəsi prinsiplərinə və qlobal dayanıqlılıq standartlarına uyğun olaraq müəyyən dayanıqlılıq və inkişaf prioritetlərinin maliyyələşdirilməsinə yeni imkanlar yaradır.
Misir Ərəb Respublikasının planlaşdırma və iqtisadi inkişaf naziri, eləcə də İİB-nin Müdirlər Şurasının üzvü Zati-aliləri Dr. Əhməd Rüstəm qeyd edib ki, sukuk alətlərinin aktivlərə əsaslanan mahiyyəti və strukturu investorlara investisiyalarının əsasını təşkil edən aktivlər üzrə vəsaitlərin istifadə istiqamətləri barədə daha şəffaf mənzərə təqdim edir və bu, şəffaflıq və real iqtisadi fəaliyyətlərin maliyyələşdirilməsi prinsiplərini daha da gücləndirir.
Malayziya Mərkəzi Bankının (Bank Negara Malaysia) sədr müavini Zati-aliləri Adnan Zaylani Mohamed Zahid öz əsas məruzəsində dayanıqlı inkişaf məqsədlərinin dəstəklənməsində etiketli sukukun artan əhəmiyyətini, eləcə də qlobal iqtisadi, sosial və ekoloji çağırışların həllində İslam maliyyəsinin rolunun gücləndirilməsini ön plana çəkib.
Yüksəksəviyyəli panel müzakirələrində Türkiyənin Xəzinə və Maliyyə Nazirliyinin nazir müavini cənab Osman Çelik, Ümumdünya Səhiyyə Təşkilatının (ÜST) Şərqi Aralıq Dənizi Regional Ofisinin (EMRO) regional direktoru Dr. Hanan Balxi və "Mizuho" bankının Borc Kapitalı Bazarları üzrə idarəedici direktoru cənab Abrar Hüseyn iştirak ediblər. Onlar tənzimləyici çərçivələr, nazirliklərarası koordinasiya, emitentlərin hazırlığı, bazar məlumatlılığı, hesabat standartları və gələcək artımı dəstəkləyə biləcək dayanıqlı maliyyə ekosistemlərinin inkişafı da daxil olmaqla, etiketli sukuk bazarının genişləndirilməsi ilə bağlı imkanları və çağırışları nəzərdən keçiriblər.
Tədbir çərçivəsində həmçinin İİB-nin sukuk emissiyası sahəsində zəngin təcrübəsi və Dayanıqlı Maliyyə Çərçivəsi altında Yaşıl və Dayanıqlı Sukukların inkişafına verdiyi töhfələr nümayiş etdirilib. Çıxış edənlər İslam maliyyəsi alətlərinin regional infrastruktur dəhlizləri, enerji bağlantıları və iqlim dəyişikliyinə qarşı dözümlülük təşəbbüsləri də daxil olmaqla konkret inkişaf nəticələrini necə dəstəkləyə biləcəyinə dair nümunələr səsləndiriblər.
Tədbir etiketli sukuk bazarını genişləndirmək və onun dayanıqlı inkişaf məqsədlərinə verdiyi töhfəni artırmaq üçün hökumətlər, inkişaf institutları, tənzimləyici orqanlar, bazar iştirakçısı və digər maraqlı tərəflər arasında daha güclü əməkdaşlığın qurulmasına çağırışla yekunlaşıb.
İslam İnkişaf Bankı (İİB) haqqında
Dünyanın aparıcı reytinq agentlikləri tərəfindən “AAA” reytinqinə layiq görülmüş İslam İnkişaf Bankı Qlobal Cənubun qabaqcıl çoxtərəfli inkişaf bankıdır (MDB). Bank 50 ildən artıqdır ki, genişmiqyaslı təsir yaratmaqla xidmət etdiyi insanların və icmaların həyat səviyyəsinin yaxşılaşdırılması istiqamətində fəaliyyət göstərir. Dörd qitəni əhatə edən 57 üzv dövləti özündə birləşdirən Bank dünya əhalisinin təxminən hər dörd nəfərindən birinin həyatına toxunur. O, insanların öz yaşıl iqtisadi inkişaflarını və dayanıqlı sosial tərəqqilərini idarə etmələri üçün imkanlar yaratmaq, ekoloji cəhətdən təmiz infrastruktur formalaşdırmaq və öz potensiallarını reallaşdırmalarına zəmin yaratmaqla inkişaf sahəsindəki çağırışların aradan qaldırılmasına və Birləşmiş Millətlər Təşkilatının Dayanıqlı İnkişaf Məqsədlərinə (DİM) nail olunmasına dəstək vermək üçün əməkdaşlığı təşviq etməyə sadiqdir. Baş qərargahı Səudiyyə Ərəbistanı Krallığının Ciddə şəhərində yerləşən İİB-nin 10 regional mərkəzi və bir mükəmməllik mərkəzi fəaliyyət göstərir. İllər ərzində Bank tək bir təşkilat çərçivəsindən çıxaraq özündə aşağıdakı qurumları birləşdirən böyük bir Qrupa çevrilmişdir: İslam İnkişaf Bankı (İİB), İslam İnkişaf Bankı İnstitutu (IsDBI), İnvestisiya və İxrac Kreditlərinin Sığortası üzrə İslam Korporasiyası (ICIEC), Özəl Sektorun İnkişafı üzrə İslam Korporasiyası (ICD) və Ticarətin Maliyyələşdirilməsi üzrə Beynəlxalq İslam Korporasiyası (ITFC).
Ən son xəbərləri səhifəmizdən də izləyin
