Zəngilan və Cəbrayıl rayonunda sakinlərə bostan-tərəvəz şitili paylanılıb

Cəbrayıl rayonu ərazisində sakinlərin həyatyanı sahələrdə bostan və tərəvəz bitkilərinin əkininə dəstək göstərilməsi, kənd təsərrüfatı fəaliyyətinin genişləndirilməsi və ailə təsərrüfatlarının inkişafının təşviqi məqsədilə genişmiqyaslı şitil paylanılması həyata keçirilib.

Dövlət və qeyri-dövlət qurumları tərəfindən ianə olaraq təqdim edilmiş bostan-tərəvəz şitilləri Cəbrayıl rayonunun Horovlu, Şükürbəyli, Cocuq Mərcanlı kəndləri və Cəbrayıl şəhəri sakinləri, həmçinin Zəngilan rayonu üzrə Ağalı və Məmmədbəyli kənd sakinləri arasında operativ və şəffaf şəkildə bölüşdürülərək paylanılıb.

Paylanma prosesi zamanı əsas prioritet vətəndaş rifahının təmin olunması, ailə təsərrüfatlarının dəstəklənməsi və sakinlərin həyatyanı sahələrdə əkin fəaliyyətinə təşviq edilməsi olub.

Şitillərin bölgüsü ailələrin sayı, təsərrüfat imkanları və müəyyən edilmiş bölgü prinsipləri nəzərə alınmaqla həyata keçirilib. Proses çərçivəsində sakinlərin siyahıya alınması, növbə sisteminin təşkili və paylanmanın koordinasiyalı şəkildə idarə olunması təmin edilib.

Həyata keçirilmiş təşəbbüs nəticəsində kəndlərdə həyatyanı sahələrdə bostan və tərəvəz bitkilərinin əkininin genişlənəcəyi, məhsuldarlığın artacağı və ailələrin kənd təsərrüfatı məhsullarından daha səmərəli faydalanacağı gözlənilir.

Eyni zamanda, istehsal olunacaq məhsulların gələcəkdə fermer kontraktinq mexanizmləri vasitəsilə bazara çıxarılması imkanlarının genişləndirilməsi və əmtəəlik məhsul istehsalının təşviqi istiqamətində mühüm zəmin formalaşdırdığı qeyd olunur.

Layihənin əsas məqsədlərindən biri də sakinlərin sosial-iqtisadi rifahının yaxşılaşdırılmasına, ailə gəlirlərinin artırılmasına və kənd təsərrüfatı fəaliyyətinin davamlı inkişafına əlavə dəstək göstərməkdir.