https://www.innews.az/uploads/news/2026-05/_innews_791255674a175a753934dc6cb_o.jpg
Bu gün Respublikanın Əməkdar məşqçisi, Milli yığma komandanın və Su İdmanı Sarayının məşqçisi, Cənab Prezident tərəfindən “Tərəqqi” medalı və Prezidentin Fəxri Diplomu ilə təltif olunmuş tanınmış üzgüçülük məşqçisi Rəşad Əliyevlə həmsöhbət olduq. 21 illik məşqçilik fəaliyyəti ərzində bir çox uğurlara imza atan Rəşad müəllim paraüzgüçülük üzrə Tokio 2020 Yay Paralimpiya Oyunlarının qalibi, ikiqat Avropa çempionu, dünya çempionu, Paris 2024 Yay Paralimpiya Oyunlarının bürünc mükafatçısı və Əməkdar idman ustası Vəli İsrafilovun şəxsi məşqçisidir. Onun rəhbərliyi altında 8 idmançı idman ustası normasını yerinə yetirərək bu ada layiq görülüb.
Körpəlik dönəmindən, məsələn 1-3 yaşda hovuza başlayan uşaqlarla, daha gec yaşda başlayan uşaqların sudan qorxma hissini yenməsi və adaptasiya prosesi necə fərqlənir?
Sudan qorxunun aradan qaldırılması və suya adaptasiya prosesi əsasən məşqçinin keçirdiyi əyləncəli tapşırıqlarla həyata keçirilir. Məşqçi ilk növbədə uşağa su ilə dost olmağı öyrətməlidir. Uşaq suda özünü rahat, sərbəst və təhlükəsiz hiss etməlidir. Kiçik yaşdan üzgüçülüyə başlayan uşaqlar adətən su mühitinə daha tez uyğunlaşırlar. Daha böyük yaşda başlayan uşaqlarda isə müəyyən qədər çəkinmə və qorxu hissi ola bilər, amma düzgün yanaşma və motivasiya ilə bu hiss qısa müddətdə aradan qalxır.
Sizcə, uşaqlar üçün ideal məşq intensivliyi necə olmalıdır: az, orta, yoxsa intensiv?
Uşaqlar üçün məşq sıxlığı ilkin mərhələdə az olmalıdır. Yaş artdıqca və orqanizm uyğunlaşdıqca məşqin həcmi də artırılmalıdır. Əsas məqsəd uşağı yormadan onda idmana sevgi formalaşdırmaqdır.
Məşqçilik fəaliyyətiniz boyunca sizi ən çox qürurlandıran və yadda qalan uğur və ya yarış hansıdır?
Əlbəttə ki, Tokio 2020 Yay Paralimpiya Oyunlarında əldə olunan qələbə mənim üçün çox qürurverici və unudulmaz uğurdur. İdmançının zəhmətinin dünya səviyyəsində nəticə verməsi hər bir məşqçi üçün böyük fəxr hissidir.
Uzun illərdir bu sahədə fəaliyyət göstərən məşqçi kimi, fəaliyyətiniz boyunca sadiq qaldığınız və əsla güzəştə getmədiyiniz əsas prinsiplər hansılardır?
Mənim üçün ən vacib prinsiplərdən biri idmançıları yarış və məşqlər öncəsi düzgün motivasiya etməkdir. Eyni zamanda məşqlərə davamlı və məsuliyyətli yanaşmaq, nizam-intizamlı olmaq və daim məsuliyyət hissi ilə çalışmaq əsas şərtlərdəndir.
Qarşıdakı dövr üçün komandanız və şəxsən özünüz üçün hansı planlar və hədəfləriniz var?
Hazırda əsas hazırlığımız qarşıdakı beynəlxalq yarışlaradır. İyun ayında Almaniyanın Münhen şəhərində Yeniyetmələrin Avropa Çempionatı, iyul ayında Fransanın paytaxtı Parisdə böyüklərin Avropa Çempionatı keçiriləcək. Bundan başqa, oktyabr ayında Bakıda ilk dəfə təşkil olunacaq Dünya Kuboku mərhələsi və noyabr ayında Dakar şəhərində baş tutacaq Yeniyetmələrin Olimpiya Oyunları üçün hazırlıq gedir. Məqsədimiz bu yarışlarda ən azı final mərhələsinə yüksələrək medal qazanmaq və Azərbaycanı layiqincə təmsil etməkdir.
Son olaraq, gələcəyin çempionlarına vermək istədiyiniz ən vacib tövsiyə nədir?
Gələcəyin üzgüçülərinə və ümumiyyətlə idmançılara tövsiyəm odur ki, məşqçilərinə diqqətlə yanaşsınlar, nizam-intizamlı olsunlar və sağlam ruh, sağlam bədənlə hədəflərinə doğru inamla irəliləsinlər. Uğurun əsas açarı zəhmət, səbir və özünəinamdır.
Ən son xəbərləri səhifəmizdən də izləyin
