https://www.innews.az/uploads/news/2026-05/_innews_4a1b5548a6fd13b95393e08e2_o.jpg
Təhsildə İnkişaf və İnnovasiyalar üzrə IX qrant müsabiqəsinin qalibi olan Goranboy rayonu Sarovlu kənd ümumi orta məktəbinin direktoru Günay Qasımovanın müəllifi olduğu “Şagirdlərin maliyyə mühəndisliyi” layihəsinin bağlanış tədbiri keçirilib.
Tədbirdə Gəncə-Daşkəsən Regional Təhsil İdarəsinin Goranboy-Naftalan rayonları üzrə təhsil sektorunun müdiri Vüsal Cəfərov, sektor əməkdaşları, layihə eksperti, layihə təlimçisi, məktəb direktoru, müəllim heyəti, valideynlər və şagirdlər iştirak ediblər.
Tədbir Azərbaycan Respublikasının Dövlət Himninin səsləndirilməsi ilə açıq elan edildikdən sonra Ulu Öndər Heydər Əliyevin və şəhidlərimizin əziz xatirəsi 1 dəqiqəlik sükutla yad edilib.
Daha sonra layihə hesabatı ilə bağlı söz layihə rəhbəri Günay Qasımovaya verilib. Layihə rəhbəri görülən işlər, əldə olunan nəticələr və hazırlanmış biznes kitabçaları haqqında ətraflı məlumat verib.
Layihədə iştirak edən şagirdlər və valideynlərin bir qismi çıxış edərək öz təəssüratlarını bölüşüblər.
Layihə eksperti Eldəniz Səttarov layihənin bütün icra prosesini izlədiyini bildirib. O, layihə çərçivəsində 60 şagird üçün biznes kitabçalarının hazırlanaraq istifadəyə verilməsini, eləcə də ölkənin nüfuzlu xəbər portallarında layihə ilə bağlı paylaşımların edilməsini layihənin ən böyük uğurlarından biri kimi dəyərləndirib.
Layihənin icrası zamanı təşkilati dəstək göstərən Goranboy rayonu Quşçular kəndi Hakim Cəfərov adına tam orta məktəbin direktoru Tərgül Məmmədovaya, Goranboy rayonu Faxralı kəndi Teymur Sadıqov adına tam orta məktəbin direktoru Samir Süleymanova və Goranboy rayonu Dəliməmmədli şəhər M. Zeynalov adına tam orta məktəbin direktoru Ceyhun Cahangirova layihə rəhbəri tərəfindən minnətdarlıq ifadə olunub.
Tədbirin bədii hissəsində keçirilmiş təlimlərdən yadda qalan maraqlı məqamları əks etdirən videoçarx təqdim edilib. Daha sonra bir qrup şagird musiqi nömrələri ilə çıxış edib və rəqs nümayiş etdirib.
Bağlanış tədbirində iştirak edən Gəncə-Daşkəsən Regional Təhsil İdarəsinin Goranboy-Naftalan rayonları üzrə sektor müdiri Vüsal Cəfərov çıxışında layihənin uğurla həyata keçirilməsində əməyi olan hər kəsə təşəkkürünü bildirib, gələcək fəaliyyətlərində uğurlar arzulayıb.
Sonda layihədə iştirak edən şagirdlər sertifikat və hədiyyələrlə təltif olunub, layihəyə dəstək göstərən komanda üzvlərinə isə təşəkkürnamələr təqdim edilib.
Ən son xəbərləri səhifəmizdən də izləyin
