https://www.innews.az/uploads/news/2026-05/_innews_1c0c0b53bfa492296cb58e76f_o.jpg
Daşkənd şəhərindəki Heydər Əliyev adına Azərbaycan Mədəniyyət Mərkəzində “Türk xalqlarının çay mədəniyyəti: ortaq kimliyin və sosial inteqrasiyanın ifadəsi” mövzusunda mədəni festival təşkil olunub.
Mərkəz uzun illərdir Azərbaycanın mədəni irsinin Özbəkistanda tanıdılması, yaşadılması və gələcək nəsillərə ötürülməsini həyata keçirir və belə bir tədbirə ev sahibliyi etməsi qardaş türk xalqlarının çay mədəniyyətlərinin qarşılıqlı tanıdılması və onların tarixi-mədəni əlaqələrinin möhkəmləndirilməsi baxımından körpü rolunu üstlənməsinə imkan yaradıb.
Tədbirin açılışında çıxış edən Heydər Əliyev adına Azərbaycan Mədəniyyət Mərkəzinin direktoru Akif Marifli bildirib ki, Prezident İlham Əliyev və Prezident Şavkat Mirziyoyevin qarşılıqlı etimada və uzaqgörən siyasətə əsaslanan fəaliyyəti nəticəsində Azərbaycan–Özbəkistan münasibətləri strateji əməkdaşlıq səviyyəsindən müttəfiqlik mərhələsinə yüksəlib. Qeyd olunub ki, bu əməkdaşlıq çərçivəsində mədəni-humanitar əlaqələrin inkişafı xüsusi əhəmiyyət daşıyır. Vurğulanıb ki, çay mədəniyyəti türk xalqlarının ortaq tarixi yaddaşını, qonaqpərvərlik ənənələrini və mənəvi dəyərlərini yaşadan mühüm mədəni irs nümunəsidir. Azərbaycan, Özbəkistan, Türkiyə və Qazaxıstanın çay ənənələri fərqli xüsusiyyətlərə malik olsa da, onları birləşdirən əsas dəyərlər – qonağa ehtiram, qarşılıqlı hörmət, mənəvi yaxınlıq və birlikdir. Bu ortaq irs türk xalqları arasında dostluq və mədəni-humanitar əməkdaşlığın daha da möhkəmlənməsinə xidmət edir.
Proqram çərçivəsində iştirakçı ölkələrin milli çay guşələri təqdim olunub. Qonaqlar Azərbaycan, Özbəkistan, Türkiyə və Qazaxıstan xalqlarının çay süfrəsi ənənələri, çayın hazırlanması və təqdim olunma xüsusiyyətləri ilə tanış olub, müxtəlif çay nümunələrini dadıblar. Milli çay guşələri hər bir xalqın süfrə mədəniyyətindəki özünəməxsusluğu, həmçinin türk dünyasını birləşdirən ümumi mənəvi dəyərləri nümayiş etdirib.
Tədbirin bədii hissəsində Mərkəzin “Qarabağ” rəqs ansamblı və “Xarıbülbül” teatr truppası milli rəqs və səhnə nümunələrini təqdim edib, ifaçılar isə türk xalqlarının mədəni zənginliyini əks etdirən musiqi nömrələri səsləndiriblər. Təqdim olunan bədii nümunələr türk xalqları arasında mədəni bağlılıq, dostluq və mənəvi birliyi dolğun şəkildə nümayiş etdirib. Proqrama töhfə verən bir sıra qurum və nümayəndə heyətlərinə təşəkkürnamələr təqdim olunub.
Tədbirdə ali təhsil müəssisələrinin müəllim və tələbələri, akademik və elmi ictimaiyyətin nümayəndələri, mədəniyyət və incəsənət xadimləri, yaradıcı ziyalılar, ictimai təşkilatların təmsilçiləri, media nümayəndələri, eləcə də türk xalqlarının mədəni irsinə maraq göstərən qonaqlar və Daşkənddə yaşayan Azərbaycan diasporunun üzvləri iştirak ediblər.
Tədbir müxtəlif nəsilləri və peşə sahələrini bir araya gətirərək ortaq mədəni dəyərlərin təbliği və mədəni-humanitar əlaqələrin inkişafı, həmçinin türk xalqlarının ortaq irsinin qorunmasına və gələcək nəsillərə çatdırılmasına dəyərli töhfə kimi yadda qalıb.
Ən son xəbərləri səhifəmizdən də izləyin
