Bəstəkar Elnar Məmmədovun 70 illik yubileyinə həsr olunmuş xatirə konserti

Mayın 21-də saat 15:00-da Üzeyir Hacıbəyli adına Konsert Salonunda Azərbaycan Bəstəkarlar İttifaqının təşkilatçılığı ilə tanınmış bəstəkar, fəlsəfə üzrə fəlsəfə doktoru, dosent Elnar Məmmədovun anadan olmasının 70 illik yubileyinə həsr olunmuş xatirə konserti keçirildi.

Azərbaycan Bəstəkarlar İttifaqından verilən məlumata görə, tədbiri giriş sözü ilə İttifaqın sədri, AMEA-nın müxbir üzvü, Xalq artisti, professor Firəngiz Əlizadə açdı.

F.Əlizadə bəstəkar Elnar Məmmədovun Azərbaycan musiqi mədəniyyətinin inkişafındakı xidmətlərindən, onun zəngin yaradıcılıq yolundan və musiqi elminə verdiyi töhfələrdən bəhs etdi.

Xatirə gecəsində Əməkdar incəsənət xadimi, sənətşünaslıq üzrə fəlsəfə doktoru, professor Elnarə Dadaşovanın və Kəminə Məmmədovanın bəstəkar barədə xatirə çıxışları dinlənildi. Həmçinin "Humay" Milli mükafatı laureatı Raya Abbasova da çıxış edərək bəstəkarın sənət dünyası və şəxsiyyəti ilə bağlı fikirlərini bölüşdü.

Tədbirin aparıcısı Azərbaycan Bəstəkarlar İttifaqının baş məsləhətçisi Sevda Hüseynovadır.

Konsertin proqramında yubilyarın və digər görkəmli bəstəkarların əsərləri yer aldı:

Elnar Məmmədov – "Simli Kvartet" (İfa edirlər: "Cadenza" Orkestrinin solistləri – Bəhram Dolayev, Samir Əsədov, Töyli Yaxşıyev, Asim Xəlilov)

Elnar Məmmədov – "Piano üçün Variasiyalar" (İfa edir: Xalq artisti Ülviyyə Hacıbəyova)

Elnar Məmmədov – "Freska" (simli orkestr üçün audiotranslyasiya)

Elnar Məmmədov – "Ekspromt" (simfonik orkestr üçün audiotranslyasiya)

Nəriman Məmmədov – "Trio" (I hissə - Üzeyir Hacıbəyliyə ithaf. İfa edirlər: Əməkdar artist Töhfə Babayeva, Əməkdar artist Elnarə Kəbirlinskaya və Əsmər Kərimli)

Qara Qarayev – Piano üçün "24 Prelüd" silsiləsindən 2 Prelüd (I dəftər №3, №5. İfa edir: Xalq artisti Ülviyyə Hacıbəyova)

Musiqi ictimaiyyətinin, tanınmış mədəniyyət xadimlərinin və sənətsevərlərin iştirak edəcəyi bu xatirə gecəsi, ömrünü musiqiyə və elmə həsr etmiş dəyərli sənətkarın irsinə ehtiramın bariz nümunəsidir.

Mədəniyyət

Bəstəkar Elnar Məmmədovun 70 illik yubileyinə həsr olunmuş xatirə konserti