https://www.innews.az/uploads/news/2026-04/_innews_63c58d10dd9c3d73e7ecf8455_o.jpg
Gənclərin telekommunikasiya və informasiya texnologiyaları sahəsində praktiki bilik və bacarıqlarının inkişaf etdirilməsi məqsədilə İnformasiya Kommunikasiya Texnologiyaları Agentliyi tərəfindən “Gələcək sənsən” Yay Təcrübə Proqramına start verilir.
Proqram ali təhsil müəssisələrinin tələbələri və gənc məzunları üçün nəzəri biliklərin praktik mühitdə tətbiqi, peşəkar iş təcrübəsinin əldə olunması və telekommunikasiya sahəsində real iş prosesi ilə tanışlıq baxımından mühüm imkanlar yaradacaq.
Təcrübə proqramında iştirak etmək istəyən namizədlər üçün minimal tələblər aşağıdakılardır:
- Yerli və ya xarici ali təhsil müəssisələrinin 4-cü kurs bakalavriat və ya 1-ci, 2-ci kurs magistratura pilləsində təhsil almaq;
- Cari tədris ilinin yaz semestri üzrə, məzunlar üçün isə yekun ümumi orta müvəffəqiyyət göstəricisinin 75-80 baldan yuxarı olması;
- İngilis dili biliyinin yaxşı səviyyədə olması.
Proqram çərçivəsində iştirakçılar telekommunikasiya sahəsində praktiki bilik və bacarıqların formalaşdırılması məqsədilə təşkil olunacaq təlimlərdə iştirak etmək, nəzəri biliklərini praktikada tətbiq etmək və real iş mühitində təcrübə qazanmaq imkanı əldə edəcəklər. Təcrübə proqramını uğurla başa vuran iştirakçılara sertifikat təqdim olunacaq. Eyni zamanda, təcrübə müddətində uğurlu nəticə göstərən iştirakçılar üçün iş imkanlarının yaradılması nəzərdə tutulur.
Namizədlərin seçimi bir neçə mərhələdə həyata keçiriləcək:
- Sənədlərin ilkin yoxlanılması;
- Müsahibə mərhələsi;
- Tapşırıq əsaslı qiymətləndirmə.
Proqramda iştirak etmək istəyən şəxslər Agentliyin rəsmi internet saytının “Karyera” bölməsi və ya sosial şəbəkə hesablarında yerləşdirilən keçidlər vasitəsilə 29 aprel – 21 may tarixləri arasında müraciət edə bilərlər.
Yay təcrübə proqramı 1 iyul 2026-cı il tarixindən 30 avqust 2026-cı il tarixinədək davam edəcək.
Agentlik gəncləri “Gələcək sənsən” Yay Təcrübə Proqramına qoşularaq peşəkar inkişaf və karyera imkanlarından yararlanmağa dəvət edir.
