https://www.innews.az/uploads/news/2026-04/_innews_0831a05780ebca5461718a597_o.jpg
24 aprel 2026-cı il tarixində Bakı Dövlət Universitetinin Fizika fakültəsində Ümummilli Lider Heydər Əliyevin anadan olmasının 103-cü ildönümünə həsr edilmiş tələbələrin “Gələcəyin alimləri” adlı XI respublika elmi konfransı keçirilib. Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Ulu Öndərin və Azərbaycanın ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.
Konfransın açılışında BDU-nun Elmi fəaliyyətin təşkili və innovasiyalar mərkəzinin direktoru Farid Nağıyev çıxış edərək tələbələrin hələ ilk kurslardan elmi-tədqiqat fəaliyyətinə cəlb olunmasının əhəmiyyətini vurğulayıb. O bildirib ki, bu yanaşma onların tədris prosesində qazandıqları biliklərin daha dərindən mənimsənilməsinə şərait yaradır. Həmçinin qeyd olunub ki, belə konfranslar gənc tədqiqatçılarda elmi nəticələrin təqdimatı, müzakirə aparmaq və suallara cavab vermək kimi mühüm bacarıqların formalaşmasında xüsusi rol oynayır.
Daha sonra Fizika fakültəsinin dekanı Bəxtiyar Paşayev tədbir iştirakçılarını salamlayaraq Ümummilli Lider Heydər Əliyevin Azərbaycan elminin inkişafına göstərdiyi diqqət və qayğıdan bəhs edib. O, müstəqillik illərində ölkəmizin keçdiyi inkişaf yoluna nəzər salaraq, Prezident İlham Əliyevin rəhbərliyi ilə əldə olunan uğurları, xüsusilə də işğaldan azad olunmuş ərazilərdə həyata keçirilən genişmiqyaslı bərpa və quruculuq işlərini diqqətə çatdırıb. Dekan, həmçinin dövlət başçısının süni intellekt texnologiyalarının tətbiqinin və elmi potensialın gücləndirilməsinin gələcək inkişaf üçün əsas prioritetlərdən biri olması barədə fikirlərini xatırladaraq, bu istiqamətdə gənclərin üzərinə böyük məsuliyyət düşdüyünü bildirib.
Konfransda hazırda BDU-da təcrübə keçən Abay Qazax Milli Pedaqoji Universitetinin magistrantları da iştirak ediblər. Onların adından Daniyar Jakhanov çıxış edərək, konfransda iştirakın onlar üçün gözəl bir təcrübə olduğunu bildirib.
Tədbirdə çıxış edən Fizika fakültəsinin tanınmış məzunu, uzun illər Meksika Dövlət Universitetində fəaliyyət göstərmiş əməkdar elm xadimi, professor Natiq Atakişiyev tələbəlik illərindən və elmi fəaliyyətə başlama yolundan söz açıb, gənc tədqiqatçılara dəyərli tövsiyələr verib. Astrofizika kafedrasının dosenti Xıdır Mikayılov da çıxışında elmi fəaliyyətin əhəmiyyətindən bəhs edərək uğur qazanmaq üçün davamlı zəhmətin vacibliyini vurğulayıb.
Fizika fakültəsi Tələbə Elmi Cəmiyyətinin elmi rəhbəri Aidə Əhmədova isə konfransın təşkilində əməyi olan əməkdaş və tələbələrə təşəkkürünü bildirib.
Daha sonra konfrans plenar iclasla işini davam etdirib. İclasa Nəzəri fizika kafedrasının müdiri Məmməd Rəcəbov sədrlik edib. İlk məruzəçi kimi II kurs magistrantı İbrahim Nəhmədov “Kütləsi koordinatdan asılı kvant zərrəciyinin yeni hiperbolik potensialda hərəkəti” mövzusunda çıxış edib. Ardınca I kurs tələbəsi Sevgi Şirinova “Fe₃O₄ nanohissəciklərinin ölçüdən asılı maqnit xassələri” mövzusunda təqdimatla çıxış edib.
Konfransın ikinci hissəsində iş bölmələr üzrə davam etdirilib. “Nəzəri fizika və astrofizika” bölməsində 20, “Molekulyar fizika” bölməsində 21, “Bərk cisimlər fizikası” bölməsində 51, “Fizikanın tədrisi metodikası” bölməsində isə 38 məruzə dinlənilib. Sonuncu bölmədə Abay Qazax Milli Pedaqoji Universitetinin magistrantları 6 məruzə ilə çıxış ediblər. Sonda iştirakçılara sertifikatlar təqdim olunub. Fizikanın aktual problemlərinə həsr olunmuş tələbə tədqiqatları professor-müəllim heyəti tərəfindən yüksək qiymətləndirilib.
