https://www.innews.az/uploads/news/2026-03/_innews_1eff3a5e39f834ea01ff91e21_o.jpg
Bakı, Azərbaycan – 30 mart 2026-cı il tarixində Bakı şəhərində, Qlobus Centerdə Əbədi Birlik Gənclər İctimai Birliyinin təşkilatçılığı ilə “Tarix danışır: Əbədi Birliklə 31 Mart Soyqırımı Həqiqətləri” adlı anım tədbiri keçirilib.
Tədbir Azərbaycan Respublikasının Dövlət Himninin səsləndirilməsi ilə açıq elan olunub, daha sonra Mart soyqırımı qurbanlarının və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Açılış nitqi ilə çıxış edən Əbədi Birlik Gənclər İctimai Birliyinin sədri İlkin Məmiyev 1918-ci ilin mart hadisələrinin xalqımızın tarixində ən faciəli səhifələrdən biri olduğunu vurğulayıb.
Tədbirdə Azərbaycan Respublikasının Milli Məclisinin deputatları Ceyhun Məmmədov və Aydın Mirzəzadə çıxış edərək Mart soyqırımı hadisələrinin tarixi və siyasi aspektlərindən bəhs ediblər.
Eyni zamanda hərbi-siyasi ekspert, polkovnik Şair Ramaldanov, yazıçı Ayaz Əlikişibəyov və tarixçi alim Boran Əziz çıxış edərək tarixi həqiqətlərin təbliğinin əhəmiyyətini xüsusi qeyd ediblər.
Tədbirin bədii hissəsində Əbədi Birlik Gənclər İctimai Birliyinin könüllüləri Ləman Əlizadə və Könül Əliyeva tərəfindən şəhidlərin xatirəsinə həsr olunmuş şeirlər səsləndirilib.
Tədbirin sonunda II Qarabağ müharibəsində qazanılmış tarixi Zəfər xüsusi vurğulanıb. Bildirilib ki, işğaldan azad olunmuş ərazilərdə genişmiqyaslı bərpa və quruculuq işləri aparılır, bölgələr yenidən həyata qaytarılır.
Sonda II Qarabağ müharibəsi şəhidlərinin ailələrinə ithaf olunmuş şeir səsləndirilib.
Qeyd edək ki, tədbirin aparıcılığı Əbədi Birlik Gənclər İctimai Birliyinin mətbuat katibi Amalya Əhmədova tərəfindən həyata keçirilib.
Tədbirin sonunda xatirə şəkilləri çəkilib və iştirakçılara təşəkkür ifadə olunaraq proqram yekunlaşdırılıb.
Ən son xəbərləri səhifəmizdən də izləyin
