ADPU-da FOMO fenomeni ilə bağlı maarifləndirici görüş

Azərbaycan Dövlət Pedaqoji Universitetində (ADPU) Təhsil Könüllüləri Tələbə Birliyinin və ADPU Gənc Məzunlar Assosiasiyasının birgə təşkilatçılığı ilə “Fear of Missing Out” (FOMO - yeniliklərdən/gündəmdən geri qalmaq, aktuallığı itirmək qorxusu) fenomeni ilə bağlı maarifləndirici görüş keçirilib.

Tədbirlərin təşkili və tələbələrlə iş şöbəsinin müdiri Turan Kərimli layihənin məqsəd və əhəmiyyətindən danışaraq qeyd edib ki, seminar FOMO fenomeni və sosial medianın insanların gündəlik həyatına təsirinə həsr olunub. Xüsusilə sosial medianın yaratdığı psixoloji təsirlər, o cümlədən FOMO, bədən dismorfik pozuntuları, depressiya, sosial təcrid və sosial media asılılığı kimi problemlər seminarın diqqət mərkəzindədir.

Sonra görüşün qonağı, ADPU Gənc Məzunlar Assosiasiyasının üzvü, psixoloq Sevinc Hüseynova “Sosial medianın həyatımıza təsiri” mövzusunda təqdimatla çıxış edib, sosial medianın gündəlik həyat, düşüncə tərzi və emosional vəziyyətə təsiri barədə iştirakçılara ətraflı məlumat verib.

Layihə iştirakçıları sosial mediadan düzgün və balanslı istifadə ilə bağlı yeni biliklər əldə edib və mövzuya dair müxtəlif yanaşmalarla tanış olublar.

Sonda Təhsil Könüllüləri Tələbə Birliyinin sədri Aydan Süleymanlı çıxış edərək təlimçiyə və iştirakçılara təşəkkürünü çatdırıb və bu cür layihələrin davamlı təşkilinin vacibliyini diqqətə çatdırıb.