Metroda fevral dinamikası: 17 milyondan çox sərnişin daşınıb

Bakı Metropoliteni fevral ayı üzrə sərnişin statistikasını açıqlayıb.

Məlumata görə, paytaxt metrosu ötən ay ərzində 17 642 798 sərnişinə xidmət göstərib. Bu göstərici ötən ilin eyni dövrü ilə müqayisədə 4,9 faiz artım deməkdir.

Fevralın ən çox istifadə olunan stansiyası

Ayın lideri “Koroğlu” stansiyası olub. Hesabat dövründə stansiyadan 1 575 464 sərnişin istifadə edib ki, bu da ümumi sərnişin axınının 8,9 faizini təşkil edir.

NFC ödənişlərində artım

Fevral ayında NFC texnologiyası ilə ödənişlərdə artım davam edib. Ötən ay NFC ilə ödənişlərin sayı 6 117 003 olub. Bu, bütün ödənişli sərnişinlərin 30,02 faizinə bərabərdir.

Yanvar ayı ilə müqayisədə 980 812 nəfər daha çox sərnişin NFC sisteminə üstünlük verib.

“Əlçatan metro” xidməti

Hesabat ayında “Əlçatan metro” xidməti çərçivəsində 162 sifariş icra olunub. Bu göstərici ötən ilin eyni ayı ilə müqayisədə 13,5 faiz çoxdur.

Qeyd edək ki, açıqlanan statistika paytaxtda ictimai nəqliyyata marağın artdığını və müasir ödəniş sistemlərinə keçidin sürətlə davam etdiyini göstərir.