https://www.innews.az/uploads/news/2025-12/_innews_3c6ed64d4f24c24845e10fd31_o.jpg
Dini Qurumlarla İş üzrə Dövlət Komitəsinin təşkilatçılığı ilə 24 dekabrda ölkəmizdə keçiriləcək Azərbaycan Din Xadimlərinin II Forumunda iştirak etmək üçün respublikamızda səfərdə olan Türkiyə Cümhuriyyəti Diyanət İşləri İdarəsinin sədri Safi Arpaquş və Marmara Universiteti İlahiyyat fakültəsinin professoru Hatice Arpaquş Azərbaycan İlahiyyat İnstitutunu (Aİİ) ziyarət ediblər.
Ziyarət çərçivəsində İnstitutun və Bakı İlahiyyat Kollecinin kollektivi ilə görüş keçirilib.
Aİİ rektoru, dosent Aqil Şirinov Azərbaycan və Türkiyə arasında əlaqələrin qardaşlıq münasibətlərinə söykəndiyini diqqətə çatdırıb. O, qonaqları ali təhsil müəssisəsində görməkdən məmnun olduğunu vurğulayıb.
Rektor Türkiyə Cümhuriyyəti Diyanət İşləri İdarəsinin sədri, professor Safi Arpaquş və Marmara Universiteti İlahiyyat fakültəsinin professoru Hatice Arpaquşun elmi fəaliyyətləri, ilahiyyat sahəsinə verdikləri töhfələr barədə bəhs edib.
A.Şirinov daha sonra akademik əməkdaşlığın əhəmiyyətini nəzərə çatdıraraq, görüşün elmi dialoqun gücləndirilməsi, din təhsili sahəsində təcrübə mübadiləsi və ortaq dəyərlər ətrafında əməkdaşlığın inkişafı baxımından mühüm səciyyə daşıdığını bildirib.
Türkiyə Cümhuriyyəti Diyanət İşləri İdarəsinin sədri Safi Arpaquş Türkiyə–Azərbaycan münasibətlərinə toxunaraq, iki ölkə arasında mövcud olan qardaşlıq bağlarının “bir millət, iki dövlət” prinsipi üzərində qurulduğunu diqqətə çatdırıb. O, birlik və bərabərlik mühitində olmağın, ortaq dəyərlərin qorunmasının və bu münasibətlərin gələcək nəsillər tərəfindən də yaşadılmasının xüsusi önəm daşıdığını söyləyib.
Safi Arpaquş daha sonra rəhbərlik etdiyi qurumun fəaliyyəti haqqında geniş məlumat verərək bildirib ki, Türkiyədə din təhsili, əsasən, imam-xətib liseyləri və universitetlərin ilahiyyat fakültələri vasitəsilə həyata keçirilir.
Safi Arpaquş dini sahədə təhsilə önəm verilməsinin, elmi yanaşmanın və doğru dini biliklərin aşılanmasının cəmiyyətin mənəvi inkişafında əsas rol oynadığını qeyd edib. O bildirib ki, alimlər peyğəmbərlərin varisləridir və dinin cəmiyyətə sağlam, düzgün şəkildə təqdim olunmasında onların üzərinə böyük məsuliyyət düşür.
Professor Hatice Arpaquş Türkiyədə din təhsilinin tarixi inkişaf nəticəsində formalaşdığını, hazırda bu prosesin cəmiyyətin ehtiyaclarına uyğun olaraq, institusional və elmi əsaslar üzərində inkişaf etdiyini diqqətə çatdırıb.
Dini sahənin öyrənilməsi zamanı elmi yanaşmanın da vacibliyinə toxunan Hatice Arpaquş ilahiyyat sahəsində araşdırma aparan alimlərin daim elmlə məşğul olmalarının zəruriliyini bildirib, həmçinin qeyd edib ki, elmi metodlardan uzaq dini yanaşmalar cəmiyyətdə yanlış anlayışlara yol aça bilər.
Hatice Arpaquş tələbələrə tövsiyələrini verərkən, məzhəbçilikdən və təfriqələrdən uzaq, ortaq dəyərlər əsasında birlik və bərabərlik mühitində yaşamağın vacibliyinə diqqət çəkib.
Qonaqlar ali təhsil müəssisəsində tələbələr üçün yaradılan şəraitlə, həmçinin İnstitutun Kitabxana fondu ilə tanış olublar.
Ən son xəbərləri səhifəmizdən də izləyin
