https://www.innews.az/uploads/news/2025-08/_innews_14a324d30462b31b167edc271_o.jpg
Ən təhlükəli insanlar düşmənin deyil — yanında olub sənə qarşı olanlardır. Çünki onların iç üzü ilə üzləşmək daha çətindir. Onlar sənin etibarını qazanar, sənə dost, sirdaş olar, amma içlərində sənin uğuruna qısqanclıq, xoşbəxtliyinə nifrət duyarlar.
Belələri səninlə gülər, amma sən büdrəyəndə içində sevinər. Səni altdan-altdan aşağı çəkməyə çalışar, amma sənə birbaşa heç nə deməz. Əksinə, yanında durub "dəstək" olur kimi görünərlər. Ən incə, ən zərərli zərbə budur — sevgidən pərdələnmiş paxıllıq.
Ətrafda çoxdur belə insanlar. Onların varlığını başa düşmək üçün diqqət yetirməlisən: uğurlarını bölüşəndə susanlara, köməyə ehtiyacın olanda görünməyənlərə, hər addımında gizlicə səni kölgədə buraxmağa çalışanlara.
Bunun başqa adıdı da ikiüzlülükdür. İkiüzlülük, görünənlə gerçəyin fərqli olduğu bir yalandır. Səni gülər üzlə qarşılayan bir insanın arxandan sənə dair dediklərini eşidəndə, daxildə bir donma hissi baş verir, şoka düşürsən. Gözlərinlə gördüyünlə qulaqlarınla eşitdiyin tərs düşür. Səni sevirmiş kimi davranan birinin içində səndən narazı qalması, paxıllıq etməsi, sənə qarşı başqa planlar qurması insanın inancını sarsıdır.
Bu dövrdə insanlar çox gözəl rollar oynayır. Səni təbrik edən biri, içində sənə uğursuzluq arzulayır. Üzünə gülümsəyən biri, səni başqasına pis təqdim edir. Bəs niyə? Çünki ikiüzlülük qorxudan və zəiflikdən doğur. İnsan birinə qarşı dürüst ola bilmirsə, ya qorxur, ya da maska taxaraq özünü güclü göstərmək istəyir.
İkiüzlü insanlar nə səmimidir, nə də sabitdir. Onlar ortam dəyişəndə rəng dəyişirlər. Səninlə bir cür, başqasıyla başqa cür. Və gün gəlir, onlar bütün maskalarının altında itib-batırlar. Amma sən neynirsən? Ürəyində daşıdığın təmiz niyyətlə, onların gerçək simasını görəndə bir az daha küskün, bir az daha ehtiyatlı olursan. Səhvi sənə etməsələr belə soyuyub, uzaqlaşırsan. Çünki düşünürsən: "Başqasının qeybətini mənə edən, mənim qeybətimi də bir başqasına edər".
Ən acı olanı isə odur ki, sən onların rolunu gerçək sanaraq içindən gələn kimi yaxınlaşmısan, sevmisən, gözəl davranıb, qayğı göstərmisən. İkiüzlülük səni yox, onun özünü çürüdür. Amma səni də dərindən yaralayır.
Sən isə insanları sözlərinə görə yox, davranışlarına görə tanı. Çünki kimin səni sevdiyini, kimininsə sadəcə yanında olduğunu zaman göstərəcək. Hər yanındakı sənə aid deyil və hər uzaq olan da düşmənin deyil.
Aysel Aslanova
Ən son xəbərləri səhifəmizdən də izləyin
