Azərbaycanda rəqəmsal maliyyə sektoru genişlənir: 19 elektron pul və 8 ödəniş təşkilatı lisenziyalaşdırılıb

Azərbaycanda maliyyə texnologiyalarının inkişafı istiqamətində atılan addımlar beynəlxalq standartlara uyğun şəkildə davam etdirilir. Məqsəd – rəqabət qabiliyyətli, innovativ və dayanıqlı maliyyə ekosistemi qurmaqdır.

innews.media xəbər verir ki, bu barədə Azərbaycan Banklar Assosiasiyasının prezidenti Zakir Nuriyev Bakıda keçirilən “Bank və Maliyyə Ekosistemində Yeni Trendlər: İnnovativ Həllər, FinTex və Təhlükəsizlik” forumunda çıxışı zamanı danışıb.

Zakir Nuriyev qeyd edib ki, Azərbaycan Mərkəzi Bankı tərəfindən həyata keçirilən islahatlar çərçivəsində açıq bankçılıq texnologiyasına əsaslanan mərkəzləşdirilmiş platforma üzərində işlər aparılır. Bu platforma ekosistem iştirakçıları arasında rəqəmsal inteqrasiyanı təmin etməyə xidmət edir.

“Maliyyə sisteminin mühüm elementlərindən biri olan fintexlər – yəni elektron pul və ödəniş təşkilatları – artıq beynəlxalq təcrübəyə uyğun şəkildə tənzimlənir. Hazırda Azərbaycanda 19 elektron pul təşkilatı, 8 ödəniş təşkilatı və 1 ödəniş sistemi operatoru lisenziyaya malikdir,” – deyə Z.Nuriyev bildirib.